ئەڤ جۆرێن هناران د فێستیڤالێ دا دهێن نیشادان
ره‌مه‌زان ده‌شتمری/زاخۆ
هنار ئه‌و جۆره فێقی یه كو د دیرۆكا فولكلۆرێ كوردی د ناڤ گه‌له‌ك چیڕۆك و سه‌رهاتی و د ناڤ گۆتنێن پێشیان دا هاتیه گۆتن. هنار بۆ گه‌له‌ك هێمایێن په‌سنێ بۆ جوانی و دێم و ڕویێن ژنان و كچان به‌حس لێ هاتیه‌كرن. هه‌ر وه‌سا د ناڤ ئایه‌تێن قورئانا پیرۆز دا ب فێقیە‌كی تامخوه‌ش په‌سنا ئه‌ڤی جۆره فێقی هاتیه‌كرن. هه‌كه‌ر بێن و به‌رێ خوه بدەینه درێژاهیا دیرۆكا چاندنێ و ژیارا خه‌لكێ كوردستانێ ژلایێ كشتوكالی ڤه و زۆر به‌هیایێ ئه‌وا گوندێن ئاڤی و ئه‌وان ده‌ڤه‌رێن باغ و بیستان لێ هه‌ین و ئه‌ڤ جۆره دار و هناره د ناڤ چه‌مێن وان دا هاتینه چاندن، هه‌ر وه‌سا گه‌له‌ك جۆر و ڕه‌نگێن هناران هه‌بووینه و هه‌ر جۆره فێقیێ هنارێ تامه‌ك چیژه‌ك ژێ دهێت وه‌ك هنارا دندك شرین و مز و ترش، هه‌ر وه‌سا فێقیێ هنارێ بۆ گه‌له‌ك كاران و هنده‌ك جۆرێن نه‌خۆشیان دهاته بكارئینان و بۆ شه‌ربه‌تێ و هه‌لگرتنێ و شابرمانێ و هه‌ر دیسا دندكێن هنارێ ل به‌رهه‌تاڤێ دهات هشكرن دگۆتنێ: شه‌برمان. ژ ئالیه‌ك دیتر ڤه تیڤلێن هنارێ بۆ گه‌مارا پاقژكرنا كه‌ڤلێن په‌زی و برنێ دهات بكارئینان. ل كوردستانێ و ب تایبه‌تی ل ده‌ڤه‌را زاخۆ ئه‌ڤ جۆره دارهناره لێ هه‌بین ئه‌و ژی هنارا ترش، شرین، سۆركانی، هرمیكی، دكانی، مه‌هداوی، حه‌له‌بجه‌یی، شه‌هره‌بانی، ئه‌مریكی، مسری، فرنسی. ده‌رباره‌یی زێده‌بوونا هنارێ ل ناڤ چه‌م و باغان دا، ئه‌و ژی ب ڕێكا قه‌له‌م و كیشه و په‌ترومه‌كرنێ دار هنار دهێته زێده‌كرن و ژبیرنه‌كین هنار داره‌كا ئاڤی یه و ل هه‌می ده‌ڤه‌رێن كوردستانێ خوه ڕادگرت و شین دبت. ده‌ڤه‌را زاخۆ بۆ ئه‌ڤی جۆره فێقیێ هنارێ یا ب ناڤ و ده‌نگه و نه‌خاسمه هنارا گوندێ ئه‌رمشتێ مێژوویه‌ك دێرین تۆماركریه. ئه‌ڤه دێ بیت ماوێ چار سالان فێستیڤالا هنارا ل سنوورێ ئیدارا سه‌بەخۆیا زاخۆ دئێته گێڕان و هه‌ژماره‌كا مه‌زن یا جۆتیارێن ده‌ڤه‌رێ پشكداریێ د فێستیڤالا هناران ئه‌وا ل كورنیشێ زاخۆ ل ته‌نشت پرا ده‌لال ل ڕۆژێن 26-27/10/2026 دهێته گێڕان و نیشادان. هه‌ر جۆتیاره‌كی ده‌ست ڕه‌نگین و ماندونه‌ناس دێ ئه‌ڤی جۆرێ به‌رهه‌مێ خوه یێ ئه‌ڤ ساله یێ هناران و ل گه‌ل ڕه‌نج و زه‌حمه‌ت و ماندیبوونا خوه یا كه‌دا سالێ پێشكێشی خه‌لكێ ده‌ڤه‌رێ و ئاماده‌بوویان که‌ت. ب راستی ده‌مێ مرۆڤ هۆسا و ب ئه‌ڤی شێوه‌یی و ئه‌ڤی جۆر و تاما هنارێ و ب ئه‌وی دیمه‌نێن سه‌رنجڕاكێش ل ئه‌ڤێ فێستیڤالێ دبینت و كو ل وه‌لاتێ مه نه‌خاسمه ل ده‌ڤه‌را زاخۆ ئەڤ ڕه‌نگ و جۆرێن هناران یێن هه‌ین و جۆتیارێن ده‌ڤه‌رێ د هه‌ر كاودان و ئاسته‌نگ و گرفته‌كێ دا چۆك نه‌داینه و ده‌ستكێ مه‌ربێر و خاكه‌ناسێ ژ ناڤ ده‌ستێن خوه نه‌هاڤێتینه و ب به‌رده‌وامی و ب ڕێنجبه‌ری خزمه‌تا وه‌لاتی كرینه و ئەڤ به‌رهه‌مێ ب ناڤ و ده‌نگ نه‌هێلاینه ببرهیت و گه‌له‌ك جۆرێن دیتر یێن هناران ل ناڤ چه‌م و بیستانێن خوه‌دا زێده بكه‌ن و ئه‌ڤی فیقی ل ناڤ بازاڕێن هه‌رێمێ یێن ناڤخۆیی و جیهانێ به‌لاڤ بكه‌ن و هه‌رێما كوردستانێ ب ئه‌ڤی جۆرێ هناران ل ناڤ بازارێن جیهانێ دا بدەنه نیاسین.
