ئەڤ دو رێیە يێن هه‌ين حوکمەت بشێت سێ مووچان بدەت
ئەڤرۆ نیوز:
ھاریکارێ سەرۆکێ زانکۆیا سلێمانیێ بۆ کاروبارێن ئابووری دیار کر کو چەندین رێ ھەنە بۆ چارەکرنا قەیرانا دارایی و ئابووری ل ھەرێما کوردستانێ و دانا سێ مووچان ل سالا داھاتی ژ وان رێیان ژی دڤێت حوکمەت پێنگاڤان ب ھاڤێژیت بۆ دانا مووچێن قەرێن فەرمانبەران. د.خالد حەیدەر، پرۆفیسورێ ھاریکار و جێگرێ سەرۆکێ زانکۆیا سلێمانیێ بۆ کاروبارێن ئابووری بۆ بەرپەرێ بازار یێ رۆژناما ئەڤرۆ ئاشکرا کر کو پێشنیارا مە وەکو ئابوورناسێن ھەرێما کوردستانێ ئەوە کو ئەو ھەر سێ مووچێن ل دەف حوکمەتێ ل سەر ھەر دوازدە ھەیڤێن سالا داھاتی بەلاڤ بکەت، داکو ببیتە بارسڤکیەک بۆ حوکمەتێ و ئەڤ قەرە ژی بھێتەدان و خەلک ژی مووچێ خوە وەرگریت و گۆت: ” ب دیتنا من دانا مووچێ سێ ھەیڤان بڤی رەنگی کو ل سەر ھەیڤێن سالا داھاتی بھێتە بەلاڤەکرن قەیرانا مووچان دێ چارەبیت و گەلەک بارگرانی ناکەڤیتە سەر حوکمەتێ دێ شێت ھەیڤان مووچان د دەمێ خوە دا بەلاڤ کەت”. ناڤھاتی ئاماژە دا وێ چەندێ کو حوکمەت دشێت ھندەک مارکێتێت مەلبەندی یێن مەزن دروست بکەت و مولکێ حوکمەتێ بن و خەلک بەرانبەر مووچێ خوە تشتان بۆ خوە ژێ وەرگریت و گۆت: ” ئەز نەیێ گەشبینم ل سالا داھاتی قەیرانا ئابووری ل ھەرێما کوردستانێ بھێنە چارەکرن، چونکی ھەتا نوکە چ رێکەفتن پەیدا نەبووینە د وارێ ئابووری دا کو ئەڤ وارە بھێتە خورتکرن و سەرەرایی ڤێ چەندێ رەوشا دەڤەرێ ب گشتی و تێکچوونا پەیوەندیێن تورکی و روسیا و ئەمریکا وەلاتێن جیران ژی کارتێکرن یا ل سەر ئابوورێ ھەرێما کوردستانێ ھەی، بەلێ ھەکە گازا ھەرێما کوردستانێ ب ئاسایی بچیت و کار بکەین ژبلی تورکی پەترۆل ب رێیا ئیرانێ ژی بچیتە ژ دەرڤە مەترسی ل سەر ئابوورێ ھەرێما کوردستانێ نابیت”.
د لایەکێ دی دا ناڤبری ئاشکرا کر کو دڤێت حوکمەتا ھەرێما کوردستانێ پووتەی و پشتەڤانیێ ل کەرتێ وەبەرئینانێ و چاندنێ بکەت و ئێدی خەلکێ مە پشت گرێدانێ ب خوە بکەت و گۆت: ” ھەکە رێکەفتن ل گەل بەغدا بھێتەکرن و ئەو رێکەفتن بھێتە بجھئینان و وەلاتێن پەترۆلا ھەرێمێ دکرن ل سەر رێکەفتنێ ئاگەھدارببن کو بەغدا رێ دایە ھەرێما کوردستانێ پەترۆلا خوە بفرۆشیت دێ ھەرێم شێت کارێن خوە ب رێڤەبەت”.