ئەڤ سالە ئەڤ جۆرێ ئەزمۆنان ناھێنە ئەنجامدان
ئەڤرۆ نیوز:
وەزارەتا پەروەردێ یا حوکمەتا ھەرێما کوردستانێ بڕیار دا کو ئەڤ سالە قوتابیێن 12ێ ئامادەیی یێن خواندنا ئیسلامی ئەزموونێن دەرەکی ئەنجام نادەن و ئێکسەر دێ پشکداریێ د ئەزموونێن دووماھی یا سالێ دا کەن.
عەباس زێباری، رێڤەبەرێ خواندنا ئیسلامی ل وەزارەتا پەروەردا حوکمەتا ھەرێما کوردستانێ ئاشکرا کر کو پشتی قوتابخانێن ئایینی ھاتینە سەر ب وەزارەتا پەروەردێ ڤە وان ل گەل رێڤەبەریا گشتی یا ئەزموونان پێ باشبوو کو قوتابیێن خواندنا ئیسلامی ئەزموونێن دەرەکی نەکەن و ئێکسەر پشکداریێ د ئەزموونێن دووماھی یا سالێ دا بکەن و بۆ مالپەرێ فەرمی یێ پارتی دیمۆکراتی کوردستان گۆت: “ژبەر وان کاودانێن ب سەر ھەرێمێ دا ھاتین ب تایبەت قەیرانا دارایی ئەڤ بڕیارە ھاتە دان داکو بارگرانی ل سەر حوکمەتێ کێم بیت”.
ھەژی گۆتنێ یە کو بەری نوکە قوتابخانێن خواندنا ئیسلامێ سەر ب وەزارەتا ئەوقاف و کاروبارێن ئایینی ڤە بوو، بەلێ ل سالا 2015 ب بڕیارەکا جڤاتا وەزیران ھاتنە ڤەگوھاستن بۆ سەر وەزارەتا پەروەردێ یا حوکمەتا ھەرێما کوردستانێ.
