ئەڤ سالە خالا گۆمرکا سەرزێری دێ بیتە دەرگەھەکێ بازرگانی
ئه‌ڤرۆ نيوز:
ئەڤە ماوێ چەند سالانە خالا گۆرکا سەرزێری ل ناحیا کانی ماسێ ھاتیە ڤەکرن، لێ ھێشتا نەبوویە دەرگەھەکێ بازرگانی و ب تنێ خەلک بۆ سەرەدان و گەشتوگۆزارێ ھاتنوچوونێ د ڤی دەرگەھی را دکەن، لەورا خەلک دخوازن کو خالا گۆمرکا سەرزێری ببیتە دەرگەھەکێ بازرگانی د ناڤبەرا ھەرێما کوردستانێ و وەلاتێ تورکیا دا، چونکی دێ ڤەژاندنەکا ئابووری ل ڤێ دەڤەرێ پەیدا بیت و ئەو خەلکێ ل سەر گوندان دێ مفایەکێ باش گەھیتە وان.
د ڤی واری دا سەربەست سەبری رێڤەبەرێ ناحیا کانی ماسێ بۆ رۆژناما ئەڤرۆ دیارکر، ھەتا نوکە وان پێنگاڤێن باش ھاڤێتینە ل گەل لایەنێ تورکیا کو خالا گۆمرکا سەرزێری یا سەر ب ناحیا کانی ماسێ ڤە ل قەزا ئامێدیێ ببیتە دەرگەھەکێ بازرگانی و ب ھیڤینە کو د ئەڤ سالە دا ئەڤ دەرگەھە ببیتە دەرگەھەکێ بازرگانی و خەلک مفایەکێ باش ژ ڤەکرنا ڤی دەرگەھی بینیت.
رێڤەبەرێ ناحیا کانی ماسێ گۆت ژی: نوکە بەرپرسەک بۆ خالا گۆمرکا سەرزێری ھاتیە دانان و ھەروەسا مە ب ھەڤکاریا قائیمقامێ قەزا ئامێدیێ و رێڤەبەریا گۆمرکا زاخۆ بزاڤێن باش ل گەل لایەنێ تورکی کرینە و ل پائیزا ئەڤ سالە ئەڤ دەرگەھە دێ بیتە دەرگەھەکێ بازرگانی و لایەنێ تورکیا ژی سۆز دایە مە و ھەروەسا خەلکێ گوندێن لایێ تورکیا ژی گەلەک بزاڤ کرینە ل گەل وەلاتێ تورکیا، ژپێخەمەت خالا گۆمرکا سەرزێری بیتە بازرگانی، چونکی ھەردو لا دێ ب ڤەکرنا ڤی دەرگەھی شێن کەلوپەلان بۆ خوە ئینن و دێ ب ڤی دەرگەھی ژین.
