ئەڤ وەلاتە دێ رۆلەکێ گرنگ د شەرێ دژی داعش دا گێریت
ئەڤرۆ نيوز:
ئاژانسا رویتەرز یا نووچەیان د راپۆرتەکێ دا دیار کریە کو پرانیا ئەندامێن پەرلەمانێ بریتانیا گەھشتینە ڤێ باوەریێ کو دڤێت پشتەڤانیێ ل پرۆژێ سەرۆک وەزیران دێیڤید کامیرۆنی بکەن، چونکو مەترسیا داعشێ ل سەر ئورۆپا رۆژ ب رۆژێ زێدەتر دبیت و ھەروەسا پرانیا ئەندامێن پەرلەمانێ بریتانیا وەسا دبینن کو ھەکە نھا وەلاتێ وان رۆلەکێ سەرەکی د شەرێ ل دژی تیرۆرێ دا نەگێریت پشتی ئارامبوونا رەوشا رۆژھەلاتا ناڤین دێ سەنگێ بریتانیا لاواز بیت و ژ بەر ھندێ ژی ئەو دێ پشتەڤانیێ ل پرۆژێ کامیرۆنی کەن و دخوازن بریتانیا رۆلەک سەرەکی د شەرێ دژی داعشێ دا بگێریت.
د پشکەکا دی یا راپۆرتێ دا ھاتیە دیار کرن کو ژ بەر ناکۆکیێن ئالیێن سیاسی ب تایبەتی ژی پارتێن ل پەرلەمانێ بریتانیا ھەتا نھا وی وەلاتی نەشیایە رۆلەک پێدڤی د شەرێ دژی داعشێ دا بگێریت و چەندین جاران سەرۆک وەزیرێن وی وەلاتی ژی بەحسێ گرنگیا رۆلێ بریتانیا کریە و دخوازا پشتەڤانیێ کریە لێ پەرلەمانی پشتەڤانی لێ نەدکر بەس ڤێجارێ و پشتی روودانێن ل پاریس و گەلەک دەڤەرێن دی یێن جیھانی پەرلەمانێ بریتانیا دێ پشتەڤانیێ ل کامیرۆنی کەت و پشتی بریارا پەرلەمانی ژی دێ بریتانیا رۆلەکێ سەرەکی د شەر دژی داعشێ دا گێریت و ئەو یەک دێ ھەڤسەنگیا شەری ل سووریایێ و عیراقێ دەتە گوھۆرین.
ل ئالیێ دی ئاژانسا بی بی سی ژی د راپۆرتەکێ دا راگەھاند کو د چەندین کۆمبوونێن بەری نھا یێن د ناڤبەرا سەرۆکێ فرەنسا و سەرۆک کۆمارێ بریتانیا دا ھاتینە گێران ھۆلاند داخواز ژ کامیرۆنی کریە کو گڤاشتنێن خوە ل سەر پەرلەمانی توند بکەت دا ئەو رێکێ خوەش بکەن ھێزێن بریتانیا ب رەنگەکێ ئەکتیڤ پشکداریێ د شەرێ دژی تیرۆرێ دا بکەن. چونکو ھەکە بریتانیا ژی ل گەل فرەنسا پشکداریێ د ھێرشێن ئەسمانی ل سووریایێ و عیراقێ دا بکەت ئەو دێ شێن د دەمەکێ کورت دا سەرکەڤتێن مەزن ل دژی تیرۆرێ تۆمار کەت و ئەو یەک دێ سەنگێ ئورۆپا ل دەڤەرێ ب ھێز کەت و ژ بەر ھندێ ژی دڤێت بریتانیا رۆلەک سەرەکی د شەرێ دژی داعشێ دا بگێریت.
ل ئالیێ دی وەزیرێ بەرگیریێ بریتانیا ژی د پرێس کۆنفرانسەکی دا راگەھاند کو تیرۆر ھاتیە بەر دەرگەھێ ئورۆپا و ھەکە ئەم نھا شەرێ تیرۆرێ نەکەین دێ زیانێن مەزن گەھنە وەلاتێ مە و گۆت: (پارتێن سیاسی یێن ل پەرلەمانی ژ بەر بەرژەوەندیێن خوە یێن سیاسی و ھەلبژارتنێن داھاتی پشتەڤانیێ ل پرۆژێ سەرۆک وەزیران ناکەن. لێ ئەڤ بابەتە بابەتەکێ نەتەوی یە و گرێدای بەرژەوەندیێن گشتی یێن وەلاتێ مە یە و دڤێت ئەم پێکڤە ل سەر ھندێ رژد بین کو دڤێت شەرێ تیرۆرێ بھێتە کرن، چونکو روودانێن ل پاریسێ و ب ھێزبوونا داعشێ ل لیبیا مەترسیێن مەزن دێ بۆ ئورۆپا و وەلاتێ مە دروست کەن، ژ بەر ھندێ دڤێت ئەم ب ھێزەکا مەزن پشکداریێ د شەرێ دژی تیرۆرێ دا بکەین، ئەز ب باوەرم دێ پەرلەمان ژی بریارەکا راست دەت، چونکو ژناڤچوونا تیرۆری ئەرکەکێ مرۆڤاتی یە و دڤێت ئەم خوە ژێ دوور نەکەین).
