ئەکادیمیەکێ عیراقی: پشتی شەڕێ داعشێ کورد دێ دەولەتا خوە دێ راگەھینن
ئەڤرۆ:
ئەکادیمیەکێ عیراقی د داخۆیانیەکێ دا بۆ رۆژناما ئەڤرۆ راگەھاند، پلانا دابەشکرنا دەڤەرا رۆژھەلاتا ناڤەراست و دامەزراندنا چەندین دەولەتێن نوو ل وێ دەڤەرێ بەری نیڤ سەدێ یا ھاتیە دانان و بێگومان دەولەتا کوردی ژی دێ ھێتە دامەزراندن، لێ نە بەری ١٠ سالان ژ نوکە.
د. محەمەد فلحی ھاریکارێ راگرێ کولیژا راگەھاندنێ ل زانکۆیا بەغدا بۆ ئەڤرۆ گوت” پتری نیڤ سەدێ یە پلانا دابەشکرنا رۆژھەلاتا ناڤین یا ھاتیە دانان و دێ ئەڤ دابەشکرنە ل سەر بنەمایێن نەژادی و مەزھەبی بن و چەندین شەڕ ژی دێ ھێنە ھەلکرن کو مەرەم ژ وان شەڕان و وێ دابەشکرنێ گرەنتیکرنا ئاسایشا ئیسرائیلێ یە، کو ڤێ چەندێ ب چاڤ ئەم دبینین و کەس نوکە بەحسێ کێشا فلستینی ناکەت، ژ بەر کو ل ھەر وەلاتەکێ عەرەبی کێشەک یا پەیدابووی کو یا مەزنترە ژ کێشا فلستینێ، و تنێ ئیسرائیل دێ یا مفادار بیت ژ وان شەڕان و دابەشکرنێ ل دەڤەرێ”.
ل دۆر دامەزراندنا دەولەتا کوردی، ب تایبەتی بریارا ڤێ دووماھیێ یا کونگرێسێ ئەمریکی بۆ ھنارتنا چەکی بۆ کوردان و سونان، ئایا ئەڤە نا بیتە دەسپێکەک بۆ بجھئینانا پرۆژێ (جۆ بایدن) یێ پارچەکرنا عیراقێ و پێکئینانا سێ دەولەتان ل عیراقێ، د. محەمەد فلحی دبێژیت” دەولەتا کوردی دێ ھەر ھێتە دامەزراندن، لێ نە بەری ١٠ سالان ژ نوکە، ژ بەر کو بارودۆخێ نێڤدەولەتی و یێ ھەرێمایەتی یێ نوکە ڕێ نادەت دەولەتا کوردی بھێتە دامەزراندن، لێ دێ فیدرالیەتەکا شیعی – سونی ھێتە پێکئینان، ژ بەر کو دابەشبوون دێ بیتە ئەگەرێ ھەلبوونا شەڕێن بێ دووماھیک د ناڤبەرا ھەردو دەولەتێن بھێنە دامەزراندن (شیعی و سونی)، لێ دەستھەلات دێ ھەر د دەستێ شیعان دا بیت کو ژلایێ ئیرانێ ڤە دھێنە پشتەڤانیکرن، د ھەمان دەم دا سونە دێ دەستھەلاتا خوە ل عیراقێ ژدەست دەن ژ ئەگەرێ نەبوونا سەرکردایەتیەکا سونی یا کاریگەر زێدەباری نەبوونا پرۆژەکێ نیشتمانی یێ سونی، ژبلی توندوتیژیێ و توندرەویێ”.
ب دیتنا ناڤبری” پشتی ژناڤبرنا داعشێ، بژارەیا ئێکانە ل دەف سونان ئەوە کو ل گەل شیعان بژین د سیستەمەکێ فیدرالی دا، لێ کورد دێ پتر دەستکەفتان بدەستڤەئینن ژ بەر ھەبوونا ھەڤڕکیا سونی – شیعی و ل دووماھیێ دێ دەولەتا کوردی ھێتە دامەزراندن ب روناھیا کەسک ژ تورکیا و ئیرانێ و پیرۆزیا ئەمریکی و نێڤدەولەتی”.