ئەگەرێن پێكنەئینانا حوكمەتا هەرێمێ و ئازراندنا دوبارە ئەنجامدانا هەلبژارتنان
نایف مەحموود
خۆیایە كو شەشێ یا خۆلا هەلبژارتنێن پەڕلەمانێ كوردستانێ ل ٢٠ چریا ئێكێ یا سالا ٢٠٢٤ هاتنە ئەنجامدان، هەژی ئاماژێ یە كو ئەڤ هەلبژارتنە ب شێوەیەكێ ئازاد و دیموكراسیانە هاتنە بڕێڤەبرن ژ لایێ كومسیۆنا بلند یا هەلبژارتنێن ئیراقێ ڤە و ب پشكداریا ڕێكخراوێن بیانی ژ بۆ سەر ڕاوەستیان و پشتڕاستبوون ل گۆر هەلبژارتنێن پاقژ و بێگەرد، ل دویڤ وان ڕێككار و میكانزمێن كۆمسیۆنا هەلبژارتنان. د ڤان هەلبژارتنان دا هەمی حزب و لایەنێن سیاسی سەنگ و هێزا خۆ یا ڕاستەقینە زانی، هەر ئالیەكی ڕێژا وان كورسیكان ب دەستڤەئینان یێن خەلكێ كوردستانێ ب ڕێكا سندۆقێن هەلبژارتنان پێ داین و هیچ گومان ژی تێدا نینە د ڤان هەلبژارتنان دا پارتی دیموكراتی كوردستان شیا ب دەنگێ زۆرینەیێ خەلكێ كوردستانێ ببیتە سەركەفتیا هەلبژارتنان و تێدا ٣٩ كورسی ب دەستڤەئینان. هەلبەت ئەڤەژی بۆ وێ باوەریا خەلكێ كوردستانێ دزڤڕیت ل سەر بنەمایێ خەبات و تێكۆشینا پارتی بۆ دۆزا ڕەوا یا گەلێ كورد و وێ خزمەت و ئاڤەدانی و خۆشگۆزەرانیا پێشكێشی خەلكێ كوردستانێ كری. پشتی ڕاگەهاندنا ئەنجامێن فەرمی یێن كۆمسیونا هەلبژارتنان و پارتی بوویە حزبا ژمارە ئێك یا هەرێما كوردستانێ هەر ل دەستپێكێ وەك عورفەكێ سیاسی پارتی نیازپاكیا خۆ ڕاگەهاند و دەرگەهێ دانوستاندن و پێكئینانا حوكمەتێ ڤەكر بۆ هەمی پارت و لایەن و لیستێن پشكداری هەلبژارتنا كری، ب وێ باوەریا پارتی ب دیموكراسیەت و فڕەڕەنگیێ هەی داخواز كر گەڕێن دانوستاندنان ل گەل لایەنێن سیاسی دەستپێبكەن، ل گۆر بەركەفتەیا هەلبژارتنان و ڕێژەیا كورسیكێن هەر لایەنەكی پلە و پۆست ل سەر پێكئینانا حوكمەتا نوی بهێنە دابەشكرن و بۆ ڤێ چەندێ ژی پەرلەمانێ كوردستانێ بهێتە كاڕاكرن؛ دا ڕوینشتنێن خۆ یێن ئاسایی دەستپێبكەت بۆ هەلبژارتنا سەرۆكێ و هەرێمێ و پاشی ڕاسپاردنا سەرۆكێ حوكمەتێ بۆ هندێ پێكئینانا حوكمەتێ گەلەك نەڤەكێشیت و بهێتە پێكئینان، نەكو بگەهیتە ڤی دەنگویێ نها دهێتە بهیستن بۆ دوبارە ئەنجامدانا هەلبژارتنان ل پشتی ١٨ مەه دەربازبووین ل سەر پێكنەئینانا حوكمەتەكا نوی و ژبەر وان ناكۆكیێن سیاسی و نە بەرهەڤبوونا لایەنەكێ سیاسی ب وی قەبارێ هەی وان كورسیكێن برین ڤیایە سیستەمێ ففتی ب ففتی پەیرەو بكەت ل سەر لایەنەكی كو ١٦ كورسیكێن وێ زێدەترن ژ وی لایەنی. ل ڤێرێ بهێن فرەهی و پەرۆشیا پارتی بۆ ئارامڕاگرتن و تێكنەچوونا بارودۆخێ سیاسی یێ هەرێمێ، هەمی دەما ب نەرمی و چوونەڤەیا پێش یا دانوستاندنان كریە ڕێكار و پەیرەوێ ل هەڤهاتنێ ژ بۆ وێ ئێكێ خەلكێ كوردستانێ نەبیتە قۆربانیێ ناكۆكیێن لایەنێن سیاسی. ژ بەر ڤێ چەندێ پارتی چەندین جاران و دوبارە و سێبارە پێكۆلا وێ چەندێ كریە و دەستپێشخەر بوویە د لێكنێزیككرنا ئالیێن سیاسی دا و تەپە هاڤێتیە د كۆشا وان دا بۆ هندێ نەگەهیتە ڤی ڕادێ نوكە و باسكرن ل سەر دوبارە ئەنجامدانا هەلبژارتنان، هەرچەندە تشتەكێ ئاساییە دەمێ پێكئینانا حوكمەتێ دگەهیتە بنبەستێ و بەربەست د ڕێكا وێ دا چێدبن، هینگێ ل شوینا وێ كو كوردستان ناڤدەنگیا خۆ یا دیموكراسی ژ دەستبدەت و ببیتە قاچكێ دەڤێ نەحەز و نەیاران و لایەنێن نیڤدەولەتی ژی ڤێ وەكو خالەكا ڕەش ب ناڤ چاڤێن كوردستانێ ڤە ببینن، نەخێر پارتی و خەلكێ كوردستانێ خەباتەكا دوور و درێژ كریە ژ پێناڤی بەرجەستەكرنا دیموكراسیەتێ و پراكتیزەكرنا وێ د ڕێیا ڕایا ئازاد و سیستەمێ ئەنجامدانا هەلبژارتنان دا، لەوما ئەڤرۆ پارتی هزر د هندێ د دكەت كو مادەم لایەنێن دی یێن سیاسی ب ڤی ئاوای د بەرهەڤ نینن حوكمەتێ پێكبینن، دبێژیت كەرەم بكەن ئەڤە د ئامادەینە جارەكا دی هەلبژارتنان دوبارە بكەین و هینگێ و ل دویڤ هەر پێشهاتەك و نویاتیەكێ نابیت زێدەتر خەلكێ كوردستانێ باجا ڕكمانەییا لایەنێن سیاسی بدەن یێن دڤێت ژ قەبارێ خۆ زێدەتر بۆ خوازن و وەرگرن، ل ڤێرێ ژی پارتی بێ منەتیا خۆ دا دیاركرن ب پشتبەستن ب باوەریا جەماوەرێ كوردستانێ و وێ سیاسەت و دیپلۆماسیەتا پارتی پەیرەو دكەت وەك حزبەكا ڕەسەن و خۆدان دیرۆكەكا پڕی سەروەری و شانازی. هەر دیسا ب باوەرا پارتی یا نەگۆر دا هەلبژارتن و سندۆقێن دەنگدانێ باشترین سەنگێ مەحەك یا ڤاڤارتنا وێ ڕاستیێنە دەما خەلكێ كوردستانێ وێ هێز و بەرپرسایەتیێ ددەتێ ژ بۆ هندێ پێشەنگ و پێشرەوا هەمی هێز و لایەنێن دی یێن سیاسی بیت، چونكی خەلكێ كوردستانێ باوەریەكا ڕەها ب پارتی دیموكراتی كوردستان و سەركردەیێن وێ هەیە گەر یا ل پێش و ب هێزبیت هینگێ كوردستان ژی دێ یا بهێز و ل پێش بیت و دێ قەوارەیێ هەرێما كوردستانێ یێ پاراستی بیت ل ژێر سیبەرا ئالایێ پارتی و پێشمەرگێ كوردستانێ.
