بارانێن ئه‌ڤرۆ زیان گه‌هاندنه 50 دوكانان
ئه‌ڤرۆ نیوز، نه‌وزاد هلۆرى:
ژ ئه‌گه‌رێ بارانێن ئه‌ڤ شه‌ڤه ل سه‌نته‌رێ قه‌زا ئاكرێ له‌هى درۆست بوون و زیان گه‌هشتن هژماره‌كا زۆرا دوكانێن وه‌لاتیان، باژێرڤانیا ئاكرێ ژى دیاركر كو تیمێن ڤێراگه‌هشتنێ بۆ هه‌ر روودانه‌كا نه‌خواستى به‌رهه‌ڤكرینه.
زێره‌ڤان ته‌مو، ژ باژێرڤانیا ئاكرێ بۆ ئه‌ڤرۆ نیوز گۆت” ئه‌ڤ شه‌ڤه ژ ئه‌گه‌رێ بارانان له‌هى درۆست بووینه، ب ڤێ یه‌كێ زیان گه‌هشتینه هژماره‌كا دوكانێن وه‌لاتیان، باژێرڤانیا ئاكرێ ب هه‌ماهه‌نگى ل گه‌ل فه‌رمانگه‌هێن دى یێن په‌یوه‌ندیدار تیمێن ڤێراگه‌هشتنێ ئاماده‌كرینه داكو د حاله‌تێ هه‌بوونا هه‌ر رودانه‌كا نه‌خواستى هاریكاریا وه‌لاتیان بكه‌ن”.
زێده‌تر گۆت” ژ بلى دوكانان، زیان گه‌هشتن ئاڤرێژان ژى و گه‌له‌ك جاده و كولان ژى پترى ئاڤ و گلێش بوون، باژێرڤانیێ ب زووترین ده‌م چاره‌سه‌ریا هه‌موو وان ئاریشان كر”.
ئیدریس هه‌ركى، ئه‌ندامێ جڤاتا پارێزگه‌ها دهۆكێ بۆ ئه‌ڤرۆ نیوز گۆت” ژ ئه‌گه‌رێ بارانێن ئه‌ڤ شه‌ڤه، له‌هى د ناڤ سه‌نته‌رێ قه‌زا ئاكرێ په‌یدابوون ب تایبه‌ت ل بازارێ كه‌ڤن، د ئه‌نجامدا زیان گه‌هشتنه پترى 50 دوكانان”.
گۆت ژى” هه‌ر چه‌نده زیانێن وان گه‌له‌ك نینن، به‌لێ تیمه‌ك بۆ دووڤچونێ ل سه‌ر زیانێن وان هاتیه پێكئینان داكو د چارچوڤێ قه‌ره‌بووكرنا كاره‌ساتێن سرۆشتى دا ئه‌و ژى بهێنه قه‌ره‌بووكرن”.
دهێته زانین ده‌مژمێر 1:00ێ پشتى نیڤرۆ باران بارین ل ئاكرێ ده‌ست پێ كر، د ده‌مژمێرا ئێكێ دا 2،8 ملم باران بارى و د ده‌مژمێرا دویێ دا 15،6 ملم باران بارى، رێژا گشتى یا باران بارینا ئه‌ڤرۆ ل ئاكرێ گه‌هشته 18،4ملم.
