بارزانى: ئه‌نجامنه‌دانا ريفراندۆمێ دده‌مه‌كێ زووتردا شاشيا ئێكانه يا كوردان بوو
ئه‌ڤرۆنيۆز:
مه‌سعود بارزانى راگه‌هاند، هه‌رچه‌نده پشتى ئه‌نجامدانا ريفراندۆمێ، هنده‌ك به‌ربه‌ست هاتن پێش، به‌لێ پاشه‌رۆژا گه‌لێ كورد مسوگه‌ركر. دان ب وێ چه‌ندێ ژى دا كو شاشيا ئێكانه يا كوردان ئه‌و بوو پرۆسا ريفراندۆمێ دده‌مه‌كێ زووتر دا ئه‌نجام نه‌دا.
بارزانى د ديداره‌كێ دا ل گه‌ل گۆڤارا نيوزويك يا ئه‌مريكى راگه‌هاند، ئۆ‌په‌راسيۆنا ده‌ست ب سه‌رداكرتنا كه‌ركووكێ ب سه‌ركردايه‌تيا ئيرانێ بوو و ب ئاگه‌هداريا به‌رپرسێن بريتانيا و ئه‌مريكا بوو، گۆت ژى بريارێن عيراقێ ژلايێ ئيرانێ ڤه دهێنه دان.
بارزانى ئاماژه دا كو هندى ده‌ليڤه‌ك هه‌بيت، دێ كورد بزاڤان كه‌ن رێ ل روو ب رووبوونا له‌شكرى ل گه‌ل له‌شكرێ عيراقێ گرن، دياركر ژى كو چو بزاڤه‌ك نه‌شێت ناسناما ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ بگوهۆرِيت.
گۆت ژى، ئه‌مريكا وجڤاكێ نێڤده‌وله‌تى دشێن رێ ل روو ب رووبوونا له‌شكرێ دناڤبه‌را هه‌ولێرێ و به‌غدا بگرن، هه‌كه هه‌ر شه‌ره‌ك ژى روو بده‌ت، دياره ژلايێ وان ڤه گلۆپا كه‌سك بۆ هاتيه هه‌لكرن.
ب ئاماژه‌دان ب وێ چه‌ندێ كو بريارا ريفراندۆمێ يا نوكه نه‌بووه، به‌لكو يا ناڤه‌راستا سالا 2014 بوو كو ژلايێ سه‌رجه‌م پارتێن سياسيێن كوردستانێ وپه‌رله‌مانێ كوردستانێ هاتبوو دان. بارزانى خوياكر ژى، شه‌رِێ داعشێ ئه‌گه‌رێ ئه‌نجام نه‌دانا ريفراندۆمێ بوو ل وى ده‌مى، شاشيا ئێكانه يا كوردان ژى ئه‌وه كو ريفراندۆم ل ده‌مه‌كێ زووتردا ئه‌نجام نه‌دا.
بارزانى كو سه‌رپه‌رشتيا ئه‌نجامدانا ريفراندۆمێ كربوو و پتر ژ 92% ژ ده‌نگده‌رێن كورستانێ ده‌نگ ب به‌لێ دابوو بۆ جودابوونێ ژ عيراقێ. گۆت ژى، هه‌رچه‌نده پشتى ئه‌نجامدانا ريفراندۆمێ هنده‌ك به‌ربه‌ست هاتن پێش، به‌لێ ب باوه‌ريا من وێ ريفراندۆمێ پاشه‌رۆژا گه‌لێ كورد مسوگه‌ركر.