بارزانى هوشدارى دا به‌غدا
ئه‌ڤرۆ نيوز:
مه‌سعود بارزانى سه‌رۆكێ هه‌رێما كوردستانێ راگه‌هاند كو هه‌رێما كوردستانێ دێ سنورێن ده‌وله‌تا داهاتى كێشيت، هه‌كه به‌غدا پێشوازيێ ل ريفراندۆما بڕياردايى بۆ سه‌ربه‌خۆيا هه‌رێمێ نه‌كه‌ت كو بڕياره د ڤێ هه‌يڤێ دا بهێته ئه‌نجام دان.
بارزانی بۆ بی بی سی راگه‌هاند كو ئه‌و هيڤى خوازه كو پشتى كورد ده‌نگى ب جودابوون ژ عيراقێ دده‌ن بگه‌هنه رێكه‌فتنه‌كێ.
حه‌يده‌ر عه‌بادى سه‌رۆك وه‌زيرێن عيراقێ ئه‌و ريفراندۆمێ ره‌ت دكه‌ت و ب كاره‌كێ “نه دستوورى” ب ناڤ دكه‌ت.
بارزانى هوشدارى دا كو دێ به‌رسينگێ هه‌ر گرۆپه‌كى گرن كو بزاڤێ بكه‌ت ب هێزێ گوهۆڕينان د كاودانێن نوكه يێن كه‌ركووك دا بكه‌ت.
گۆتژى: “ريفراندۆم پێنگاڤا ئێكێ يه، ئه‌ڤه جارێ يا ئێكێ يه د مێژوويا گه‌لێ كوردستانێ دا كو ب ئازاديێ بڕياريێ ل سه‌ر چاره‌نڤيسێ خوه بده‌ت و پاشان ژى دێ كه‌ڤينه دانوستاندنان ل گه‌ل به‌غدا، بۆ گه‌هشت ب رێكه‌فتنێ ل دۆر سنور و په‌ترۆل و ئاڤێ”.
بارزانى ب روونى ژى هوشدارى دا و بۆ به‌غدا گۆت: “دێ هه‌موو پێنگاڤان گرينه به‌ر، هه‌كه پێشوازيێ ل ريفراندۆمێ نه‌كه‌ن”.
مه‌سعود بارزانى سه‌رۆكێ هه‌رێما كوردستانێ هوشداريا وه‌لاتێن جيهانێ كو د ناڤ دا ئه‌مريكا و بريتانيا ره‌تكر ده‌رباره‌ى ئه‌نجامدانا ريفراندۆمێ.
بڕياره ل رۆژا 25ى ئيلۆنا 2017ێ ل سه‌رانسه‌رى هه‌رێما كوردستانێ و ده‌ڤه‌رێن كوردستانى يێن ده‌رڤه‌ى ئيدارا هه‌رێمێ ريفراندۆم بۆ سه‌ربه‌خۆيا كوردستانێ ب رێڤه بچيت.