بارزانى و جێگرێ سه‌رۆكێ ئه‌مريكا كۆمبوون
ئه‌ڤرۆ نيوز:
ب گۆره‌ى راگه‌هاندنه‌كا سه‌رۆكاتيا هه‌رێما كوردستانێ كو وێنه‌ك بۆ ئه‌ڤرۆ نيوز ره‌وانه كريه، دوهى رۆژا پێنجشه‌مبى رێكه‌فتى 28ى نيسانا 2016ێ مه‌سعود بارزانى سه‌رۆكێ هه‌رێما كوردستانێ ل هه‌ولێر پێشوازى ل جو بايدن جێگرێ سه‌رۆكێ ئه‌مريكا و شانده‌كێ ل گه‌ل دا كر.
د كۆمبوونێ دا سه‌رۆك بارزانى سۆپاسيا گه‌ل و حوكمه‌تا ئه‌مريكا كر كو د شه‌رێ دژى تيرۆرستێن داعش دا پشته‌ڤانيا گه‌لێ كوردستانێ بوون و پشته‌ڤانيا له‌شكرى و دارايى يا هێزا پێشمه‌رگێ كوردستانێ كريه.
پێشتر رۆیتەرز ئاشكه‌را كربوو كو جو بايدن د سه‌ره‌دانا خوه دا ل گه‌ل هه‌رێما كوردستانێ دێ دانوستاندنێ ل سه‌ر وان 415 مليۆن دۆلاران كه‌ت ئه‌وێن بڕياره ئه‌مريكا ب هێزێن پێشمه‌رگه‌ى بده‌ت.
هه‌ر د كۆمبوونێ دا جێگرێ سه‌رۆكێ ئه‌مريكا سۆپاسيا هه‌لويستێ هه‌رێما كوردستانێ كر د هاريكاريا پرۆسا سياسى يا عيراقێ دا و بزاڤێن وان بۆ ڤه‌گه‌راندنا سه‌قامگێريا سياسى.
د پشكه‌كا دى يا كۆمبوونێ دا به‌حس ل دووماهى پێشهات و گورانكاريێن مه‌يدانى يێن شه‌رێ داعش ل عيراق و سوريا هاته كرن و چاوانيا هه‌مانگه‌هيێ د ناڤبه‌را هێزا پێشمه‌رگه‌ى و هێزێن عيراقى دا و چاوانيا رزگاركرنا باژێرێ مووسل و قووناغا پشتى رزگاركرنێ.
