بارزانی – پارتی ئامرازێ بەرەڤانیکرنێ بوویە ل پێناسەیا گەلێ کورد
ئەڤرۆ نیوز ، نەوزاد ھلۆری:
سەرۆکێ پارتی دیموکراتی کوردستان ب ھەلکەفتا ١٦ تەباخێ سالرۆژا دامەزراندنا پارتی دیموکراتی کوردستان پەیامەک ئاراستەیێ لایەنگیرێن پارتی کر و دیارکر کو ھەردەم ئەندامێن پارتی ب گوتن و کریار پێشەنگبووینە و دخوازم کو ھون ھەموو پشتەڤانیا ریفراندۆم و سەربخوەیی یا کوردستانێ بکەن.
مەسعود بارزانی سەرۆکێ پارتی دیموکراتی کوردستان د پەیاما خودا کو ئێڤاریا ئەڤرۆ بەلاڤکریە دیارکر کو کادر و لایەنگیرێن پارتی ھەردەم دگوتن و کریارێن خوە دا پێشەنگبووینە و گۆت: ( پارتی ھەر ل دەستپێکا دامەزراندنێ ھەتا نھا رێیەک بویە بو ب دەستڤەئینانا ئارمانجێن دیموکراسی و نیشتمانی و نەتەوەیی بو گەلێ کورد و دھەمان دەم ژی دا ب ھەڤپشکی ل گەل ھێزێن دن یێن شورشگێر و نیشتمان پەروەرێن کوردستانێ بویە ئامرازێ بەرەڤانیکرن ل ماف و پێناسەیا گەلێ کورد د ھەموو قوناغان دا )
زێدەتر گۆت : ( پارتی ھەردەم د گوتن و کریارێن خوە دا پێشەنگبوویە و ئەرکێ بەرپرسیارەتیان ب ستویێ خوڤە گرتیە د قوناغێن خەباتا گەلێ کوردستانێ دا و د نھا ژی دا د قوناغا ئاڤاکرنا کوردستانێ و شەرێ ل گەل تیرورێ و پێنگاڤێن بەر ب سەربەخویێ ب شانازی ڤە خودانێ ھەمان ئەرک و رولەکێ یە ، ژ بەرڤێ بو گەهشتن ب ڤێ یەکێ بێی حساب قوربانی داینە)
بارزانی د درێژاھیا پەیاما خوە دا دیارکر ژی کو و گۆت ژی : ( بڤی ھەلکەفتێ ب پێدڤی دزانم کو سوپاسیا خوراگری و جەماوەرێ ماندونەناسێ پارتی و ھەموو خەلکێ کوردستانێ بکەم و ئەڤ یەک ژی مە ب ھێزتر دکەت کو پێنگاڤێن بەر ب ئانیدە و کارکرن بو مسوگەرکرنا مافێن رەوایێن گەلێ کورد بەردەوام بین ، باشترین بەرسڤ بو خوونا شەھیدان و قوربانیدانا گەلێ کورد ژی سەربخوە بوونا گەلێ کوردە ، سەربخوەی یا کوردستانێ و پێکڤە ژیان ئارمانجا پارتی دیموکراتی کوردستانە و پارتی بەرھەڤی ھەموو جورە قوربانیدانەکێ یە بو گەهشتن بڤێ ئارمانجێ و پارتی باوەری ب ئێکرێزی و پێکڤەژیانا نافخویی ھەیە ل کوردستانێ)
د پەیاما بارزانی دا زێدەتر ھاتیە : (داخوازێ ل ھەموو لایەنگیرێن پارتی دکەم کو ب ھەموو ھەول و شیانێن خوە ڤە مل ب ملێ خەلکی کوردستانێ پشتەڤانیا پرسەیا ریفراندۆمێ بکەن ژبەرکو ژبلی سەربخوەیێ گەلێ کوردستانێ چوو رێین دن ل بەراھیێ نینن داکو ئێدی کارەسات دوبارە نەبن و ئاشتی و سەقامگیری بەردەوام بیت )
سوبەھی رۆژا ١٦ تەباخێ کود بیتە سالرۆژا دامەزراندنا پارتی دیموکراتی کوردستان ل سالا ١٩٤٦ لسەر دەستێ مەلا موستەفا بارزانی و ھەڤدەمە ل گەل ژ دایکبوونا مەسعود بارزانی کو نھا سەرۆکێ پارتی دیموکراتی کوردستانە.
