بازار بۆ حلیكێن ده‌ڤه‌را بارزان نینه
ئه‌ڤرۆ نیوز ، نه‌وزاد هلۆرى:
پرۆژه‌كێ زانستى یێ چاندنا دارێن فێقى ل ده‌شتا بلێ یا سه‌ر ب ده‌ڤه‌را بارزان ڤه هاتیه چاندن و ئه‌ڤ ساله به‌رهه‌مه‌كێ باش دایه، به‌لێ نه‌بوونا بازارى بۆ فرۆتنا به‌رهه‌مێن وان ، جوتیار دلگران كرینه.
حه‌سه‌ن چاڵى، خودانێ ئێك ژ وان بیستانێن فێقى كو رێژه‌یه‌كا باش یا حلیكان چاندینه بۆ ئه‌ڤرۆ نیوز گۆت: (وه‌كو تێست مه هژماره‌كا زۆر یا دارێن هه‌مه‌جۆر یێن فێقى ل ده‌ڤه‌را بارزان و ل ده‌شتا بلێ چاندینه و ئه‌ڤ ساله پشكه‌ك ژ وان كه‌فتیه به‌رى و به‌رهه‌مه‌كێ باش دایه ، به‌لێ نه‌بوونا بازارى بۆ فرۆتنا به‌رهه‌مێن مه زیانێن زۆر گه‌هاندینه مه، ژبه‌ركو زۆر ب ئه‌رزانى دهێنه فرۆتن).
زێده‌تر گۆت: (مه ب هه‌ڤپشكى ل گه‌ل كۆمپانیا شوجاعى پرۆژه‌كێ 300 هزار شتلى ل ده‌شتا بلێ چاندیه كو پێك دهێت ژ هه‌موو داروبارێن وه‌كو هنار ، خۆخ ، مژمژ، هرمى ، حلیك و گویز و چه‌ند جۆره‌كێن دى یێن فێقى یێن ئیرانى چاندینه و پتريا وان هاتینه به‌رهه‌مى ب تایبه‌تى حلیك كو رێژه‌یه‌كا ئێكجار زۆر یا حلیكا پێڤه هاتینه و ژبلى وێ یه‌كێ كو ئه‌م شتلان دفرۆشین د هه‌مان ده‌م دا ئه‌م فێقى ژى دفرۆشین و پێدڤیه لایه‌نێن شوله‌ژێ هاریكاریا جوتیاران بكه‌ن ب تایبه‌تى د په‌یداكرنا بازاره‌كێ بۆ فرۆتنا به‌رهه‌مێن وان و نه‌هێلن حلیكا بیانى بهێته بازارى).
