باشترینێن ٢٠١٥ دێ ل سەر ئاستێ پارێزگەھا دھۆکێ ھێنە ھەلبژارتن
ئەڤرۆ نیوز:
وەکو رێزگرتن بۆ ئەو وەرزشڤانێن سالا ٢٠١٥ خزمەتا وەرزشا پارێزگەھا دھۆکێ کری و ئەو راھێنەر و یاریکەرێن کور و کچ ل سەر ئاستێ پارێزگەھێ ئەنجام ب دەستخوڤە تومارکرین نوونەرەتیا دھۆک یا لژنەیا ئولومپیا کوردستانێ دیارکری یە ب چاڤدرێریا پارێزگەھێ دھۆکێ ئەو دێ باشترین وەرزشڤانێن ٢٠١٥ ل سەر ئاستێ پارێزگەھێ دەستنیشانکەن
د. ئەحمەد قاسم بەرپرسێ نوونەرەتیا دھۆک یا لژنەیا ئولومپی دیارکری یە دھوک وەک رێزگرتن بۆ ماندیبون و ئەو دەستکەفتێن وەرزشا پارێزگەھێ د سالا بوری دا دەستڤە ئیناین دێ ئاھەنگەکێ ئەنجامدان پشتی جەژنا نەوروزا ئەڤ سالە ب چاڤدێریا پارێزگەرێ دھۆکێ و تێدا دێ باشترین وەرزشڤان ل سەر ئاستێ یاریکەرێن کچ و کور و راھێنەران ھێتە ھەلبژارتن بۆ ڤێ مەرەمێ ژی ماوەکە کار ل سەر ڤی پرۆژەی دکەن و لژنەیەک ژ حەفت کەسان پێکئینایە بۆ سەرپەرشتیا ڤی کاری و ب ھەڤکاری ل گەل ھەمی ئێکەتیێن وەرزشی یێن سەر ب نوونەراتیا دھۆک ڤە ھەمی ئەنجامێن یانە و یاریکەران ل دووڤ چەند پیڤەران ژلایێ لژنا سەرپەرشت ڤە ھاتینە دانان فرێکرینە و بریارە ل ماوەکێ نێزیک ڤێ ئاھەنگێ ئەنجام بدەین.
ناڤبری ل دۆر شێوازێ ھەلبژارتنا باشترینێن پارێزگەھێ گۆت: ھەلبژارتنا باشترین وەرزشڤان ل سەر ئاستێ پارێزگەھێ دێ ل دووڤ دەنگدانێ بیت و دێ ٥٠ کەسان مافێ دەنگدانێ ھەبیت و ژوانا ٢٠ رۆژنامەڤانێن وەرزشی و وەرزشڤانێن دێرین ل گەل چەند کەسێن دی کو دیڤچوونا وەرزشی دکەن و ئەو یاریکەرێن دێ چنە د ڤان ڤاڤارتنان دا زێدەتر ژ ١٠ یاریکەران نە کو دێ ھەڤرکیێ ل سەر ڤی ناسناڤی کەن.
