بالیۆزێ ئیرانێ ل ئیراقێ سوپاسییا سەرۆكێ حوكمەتا هەرێمێ دكەت
ل بەرانبەر میهڤانیكرن و برێكرنا سەرەدانكەرێن چلەیا بەهیدارییا ئیمامێ حسێن، بالیۆزێ ئیرانێ ل ئیراقێ سوپاسییا سەرۆكێ حوكمەتا هەرێما كوردستانێ كر.
نڤیسینگەها راگەهاندنا بالیۆزێ ئیرانێ ل ئیراقێ د بەیاننامەیەكێدا بەلاڤكر» محەمەد كازم ئال سادق، بالیۆزێ ئیرانێ ل ئیراقێ، ب تەلەفۆنێ پەیوەندی ل گەل مەسرور بارزانی، سەرۆكێ حوكمەتا هەرێما كوردستانێ كر و سوپاسییا حوكمەت و خەلكێ هەرێما كوردستانێ كر بۆ مێهڤانیكرن و برێكرنا سەرەدانكەرێن چلەیا بەهیدارییا ئێمامێ حسێن».
دیاركر ژی» بالیۆزێ ئیرانی ب مەسرور بارزانی راگەهاند، د ئەوی دەمی دا سەرەدانكەرێن ئیرانی رازیبوون و خوەشحالییا خوە بەرامبەر هاریكاری و خزمەتگوزاریێن هەرێما كوردستانێ دەربڕی».
د بەرانبەر دا مەسرور بارزانی، دیاركر: خزمەتكرنا سەرەدانكەرێن ئێمامێ حسێن ب ئەركەكێ پیرۆز دزانین و هیڤیدارین بشێین ل سالێن داهاتیدا خزمەتگوزاریێن زێدەتر پێشكێش بكەین.
ئەڤە د دەمەكی دایە د دەمێ چەند رۆژێن بۆری 69 هزار و 409 سەرەدانكەر ب رێكا دەرگەهێ حاجی ئۆمەران و باشماخ بۆ پشكداریێ د چلەیا ئیمامێ حسێن، هاتبوونە د ناڤ ئاخا هەرێما كوردستانێدا و ژ وێرێ بۆ كەربەلا هاتبوونە ڤەگوهاستن.
