بانده‌كێ بازرگانێن مادێن هۆشبه‌ر ل ئاكرێ هاته گرتن
ئەڤرۆ نیوز ، زنار تۆڤی:
رێڤه‌به‌ریا نه‌هێلانا مادێن هۆشبه‌ر ل هه‌رێما كوردستانێ گرتنا بانده‌كێ بازرگانێن مادێن هۆشبه‌ر ل قەزا ئاكرێ راگه‌هاند و دیاركر: کو 30 كیلۆگرامێن مادێن هۆشبه‌ر ژ جۆرێ هیرۆیین ل گه‌ل وان سووچباران دا بوون.
د راگه‌هاندنه‌كا رێڤه‌به‌ریا نه‌هێلانا مادێن هۆشبه‌ر دا هاتیه: هێزێن رێڤه‌به‌ریا نه‌هێلانا مادێن هۆشبه‌ر یێن هه‌رێما كوردستانێ ب هه‌ماهه‌نگی ل گه‌ل رێڤه‌به‌راتیا ئاسایشا ئاكرێ، د چالاكیه‌كا سه‌ركه‌فتیانه دا شیان بانده‌كا بازرگانێن مادێن هۆشبه‌ر کو ژ چار کەسان پێكهاتبوون ل قەزا ئاكرێ بگرن، هه‌ر چار سووچبار بۆ دادگه‌هێ هاتینه ره‌وانه‌كرن و لێكۆلین ل گه‌ل دا ده‌ست پێكرینه.
د راگه‌هاندنێ دا هاتیه ژی : 30 كیلۆگرامێن مادێن هۆشبه‌ر ژ جۆرێ هیرۆیین ل گه‌ل وان سووچباران دابوون كو ب شێوه‌یه‌كێ مۆكم ل ناڤ ترۆمبێله‌كا جۆرێ هیوندای تیكسۆن د ناڤ خانیه‌كی دا ل تاخا شه‌هیدان یێ ئاكرێ ڤه‌شارتبوون.
هەروەسا بەری چەند رۆژان ل ناحیا رۆڤیا ژی هێزێن نه‌هێلانا مادێن هوشبه‌ر ل هه‌رێما كوردستانێ ده‌ست ب سه‌ر 29 كیلۆگرامێن مادێن هوشبه‌ر دا و ل گه‌ل دو سوچباران دا گرتبوون.
