باندێن لەشفرۆشیێ پەیدا بووینە و بازرگانی پێ دھێتە کرن
ئه‌ڤرۆ نيوز:
ئەندامەکا پەرلەمانێ عێراقێ ئیماژە بڤێ چەندێ دکەت کو، دیاردەیا ھەڤڕووشیێ ھەمبەر ئافرەتان زێدە کریە و ھەموو جڤاک ژی ڤەگرتیە ھەتا دناڤ پەرلەمانی زەلام دەستێ خوە بۆ ئافرەتێ دبەن و ھەڤڕووشی ژنێ دبن، ھەروەسا دیار کر، ل ھەرێما کوردستانێ ب کۆم ئافرەتێن لەشفرۆش ل دەرڤە د ئینن و بازرگانی ب ئافرەتێ دھێتە کرن، لەوڕا دڤێت قانوونەک ل پەرلەمانی بۆ قەدەغەکرنا بازرگانی کرن ب مرۆڤان بھێتە دەرکرن.
رێزان شێخ دلێر، ئەنداما پەرلەمانێ عێراقێ بۆ رۆژناما ئەڤرۆ دیار کر کو، دیاردا ھەڤرووشیێ ل ھەمبەر ئافرەتان زێدە کریە، چونکی ئافرەت ژبەر چەند ئەگەرەکان نەشێن وەکی پێدڤی بەڕەڤانیێ ژ خوە بکەن، بەلێ ل گورەی قانوونێ ھەر ئافرەتەکا تووشی دەستدرێژیێ دبیت و ھەر زەلامەکێ ھەڤڕووشی ئافرەتا ببیت، قانوونێ سزایەکێ تایبەت بۆ دیار کریە و گۆت: لێ مخابن دناڤ جڤاکی دا ئاریشە بۆ ئافرەتا دھێنە پەیدا کرن، بۆ نموونە ھەکە زەلامەک ھەڤڕووشی ئافرەتەکێ ببیت و ئافرەت بچیتە دادگەھێ سکالایێ تۆمار بکەت، دێ ژلایێ مالباتێ و دەوروبەران ڤە ئاریشا وێ پتر ھێتە مەزن کرن، ژبەرکو زۆر جارا ھەبوویە ھەکە ئافرەتەکێ گۆتبیت فلانە کەس ھەڤڕووشی من بوویە ئێکسەر بۆیە ئاریشەیەکا مەزن و ئەو کچ یان ئافرەت ل وی کەسی ھاتیە مەھر کرن، ئاخر مەعقوول نینە کەسەک ھەڤرووشی ئافرەتێ ببیت و ئێکسەر ل وی کەسی بھێتە مەھر کرن.
رێزانێ گۆتژی: ئەز بخۆ چەند سالان ڤەکۆلەر بووم ل دادگەھێن ھەرێما کوردستانێ، جارەکێ دناڤ پاسێ دا زەلامەکی دەستدرێژی ل سەر ئافرەتەکا پارێزەر کر، دەمێ چووینە ھەمبەر دادگەھێ دادوەری گۆتە ئەڤێ پارێزەرێ باشە تە بۆچی ئەڤ جلکێن وەسا ل بەر خوە کرینە ھەتا خەلک ھەڤڕووشی تە ببیت.
“پەرلەمانتارەکا ئافرەت: د ناڤ پەرلەمانی دا زەلام ھەڤرووشی ئافرەتێ دبن”
ئەڤێ پەرلەمانتارێ ئەو ژی بەحس کر کو، ب شێوەیەکێ گشتی ئەڤە دیاردەیەکا بەربەلاڤە دناڤ جڤاکێ مەدا و ژبەر ئەڤان داب و نەریتێن جڤاکی ئافرەتێن دبنە قوربانی و نەشێن ب رێیا دادگەھێ مافێ خوە وەربگرن.
ھەروەسا رێزانێ ئەو چەندە ژی نەڤەشارت و گۆت: ل ھەموو جھەکی زەلام ھەڤڕووشی ئافرەتا دبن، ھەتا نوکە ئەم ل پەرلەمانی داینە و دەستدرێژی ل سەر ئافرەتان ھەیە و ل دەزگەھێن قانوونی ئەڤ کارە دھێتە کرن، لەوڕا دەمێ کەسەک ھەڤرووشی ئەڤێ ئافرەتێ دبیتیا فەرە ئافرەت بخوە بەڕەڤانیێ ژ خوە بکەت و ب رێیا دادگەھێ مافێ خوە وەربگریت، ئەڤجا چ تووشی ھەڤرووشیا دەستی ببیت یان یا ئاخفتنێ.
لدۆر بارزگانی کرنێ ب مرۆڤان رێزان شێخ دلێر دا زانین کو، ل عێراقێ قانوونەک ھەیە بۆ رێگری کرنێ ل بازرگانیێ ب مرۆڤان، بەلێ ل ھەرێما کوردستانێ چ قانوونێن تایبەت نینن و گۆت: چەندین جارا من بخوە بزاڤ کرینە قانوونەک بھێتە دەرکرن بۆ ڤێ چەندێ، لێ مخابن ژبەر قەیرانێن نوکە عێراق و ھەرێما کوردستانێ تێدا دەرباز دبن، بازرگانی کرن ب مرۆڤان زێدە بوویە، ژبەرکو ھژمارەکا زۆرا زەلامان د شەڕی دا بووینە قوربانی و ئەڤێ ئاوارەبوون و نەبوونیا خەلکی بۆیە پالدەرەک بۆ ڤێ چەندێ ئافرەت پەنایێ بۆ کارێ لەشفرۆشیێ ببەن، یان زۆر جارا دناڤا کەمپا دا ھندەک خێزان ھەنە ئەو بخوە ھاندەرن بۆ بازرگانی کرن ب ئەندامێن وانا، ھەتا ل ھەرێما کوردستانێ باندێن ئافرەتا ل دەرڤە ژلایێ ھندەک کەسا دھێنە بکارئینان بۆ لەشفرۆشیێ و بۆیە بازرگانیا ھژمارەک کەسا، لەورا یا فەرە ب رێیا قانوونێ رێگری لێ بھێتە کرن و رێیێ نەدەن ئیدی بڤی شێوەی بازرگانی ب مرۆڤا بھێتە کرن.
