بانكا ناڤه‌ندى یا عیراقێ بریارەکا نوو ده‌ردکەت و کوردستانێ ژی ڤەدگریت
ئەڤرۆ نیوز ، تۆڤی:
بانكا ناڤه‌ندى د بریارەكێدا داخواژ ژ هەموو بانكێن مۆلەتدایی یێن عێراقێ و هه‌رێما كوردستانێ كریه کو پابه‌ندبن ب وان بهێنڤەدانێن کو ل وان له‌پارێزگەهان دهێنە ده‌رکرن.
ب بریارا هژمار (228) کو ئیمزایا مونه‌زر عه‌بدولقادر جێگرێ بانكا ناڤه‌ندى یا عێراقێ ب (وه‌كاله‌ت) ل سەرە، بانكا ناڤه‌ندى یا عێراقێ بڕیارەک درباره‌ى بهێنڤەدانێن سه‌رجه‌م بانكێن مۆلەت پێدایی یێن هه‌رێمێ و عیراقێ ده‌ركریە.
د وێ بریارێدا هاتیه دڤێت هەموو بانكێن بازرگانی یێن مۆله‌تپێدایی یێن عیراقێ و هه‌رێمێ پابه‌ندبن ب وان بهێنڤەدانێن کو ل وان پارێزگەهێن (حوكمه‌تا خۆجهی) دهێنە ده‌رکرن، یان ژی وان بهێنڤەدانێن کو د فەرمینە ل عیراقێ یان ژی ل كوردستانێ دهێنە ده‌ر‌كرن.
ئه‌ڤ بریارا بانكا ناڤه‌ندى یا عیراقێ د دەمەکێ دایە، کو لدووڤ سیستەمێ بانكێ ئەڤرۆ ئێكشه‌مبێ 1 ته‌موزا 2018، ل هەموو بانكێن بازرگانى و حكومی یێن هه‌رێمێ مامه‌لێن وەلاتیان ناهێنە برێڤە برن، ئه‌ڤە ژی ب ئەگەرێ هندێ کو دێ بانك مژۆلی داخستنا حیسابا نیڤا سالێ بن، كو بۆ دیاركرنا رێژا زیان و قازانجا بانكانە کو سالانه دووجاران دهێته دیارکرن.
