باوەرییا ئیرانێ ب دانوستاندنان نینە
دارا ناتق چاڤدێرێ سیاسی و ئەندامێ بەرێ یێ سەرکردایەتیا حزبا دیموکرات یا کوردستان/ ئیران بۆ رۆژنامەیا ئەڤرۆ دیار کر، هەتا نها ب فەرمی حزبا وان و هێزێن دی یێن رۆژهەلاتێ کوردستانێ سەبارەت ب قووناغەکا ئاشتیێ ل گەل ئیرانێ نەهاتینە ئاگەهدارکرن و چو تشتێن وەسا ژی نینن، د راستی دا نها رژێما ئیرانێ گەلەک لاواز بوویە و دیسان دڤێت فێلەکا نوو بکەت و وەسا نیشا جیهانێ بکەت کو دڤێت پرسا کوردی ب رەنگەکێ ئاشتیانە چارەسەر بکەت.
دارا ناتق ئەو یەک ژی دیار کر، باوەریا رژێما ئیرانێ ب دانوستاندنان نینە و ئەزموونا بەری نها ژی هاتیە سەلماندن کو ئیران یا بەرهەڤ نینە رێزێ ل ئیرادەیا گەلێ کورد بگریت و پرسا کوردی ژی چارەسەر بکەت و گۆت: (هەتا نها گەلەک جاران پارتیێن رۆژهەلاتێ کوردستانێ دیار کرینە هەکە رژێما ئیران بەرهەڤ بیت ب رێیا دانوستاندنان پرسا کوردی چارەسەر بکەت و رێزێ ل داخوازیێن گەلێ کورد ل ئیرانێ بگریت ئەو بەرهەڤن ل گەل کۆمارا ئیسلامی دانوستاندنان بکەن، لێ هەتا نها ژی تەهرانێ ب رەنگەکێ ئەرێنی بەرسڤا داخوازیێن هێزێن کوردی یێن رۆژهەلاتێ کوردستانێ نەدایە و ئەو یەک ژی نیشا ددەت کو ئیران بەرهەڤ نینە ب رێیا دانوستاندنان پرسا کوردی چارەسەر بکەت).
دارا ناتق د دووماهیا ئاخڤتنا خوە دا ئەو یەک ژی دیار کر، بەری نها د. قاسملۆ و د. شەرەفکەندی ل سەر مێزا دانوستاندنان ل گەل ئیرانێ هاتینە شەهید کرن و هەروەسا نها ب هزاران لاوێن کورد یێن ئازادیخواز د زیندانێن ئیرانێ دانە و رۆژانە ژی زۆرداریا ل هەمبەر گەلێ کورد ل ئیرانێ زێدەتر دبیت و تەهران بەرهەڤ نینە پرسا کوردی و پرسا نەتەوەیێن دی یێن ل ئیرانێ چارەسەر بکەت.
