بریارا دووماهیێ بۆ دابینكرنا بودجێ لیوایێن هه‌ڤپشك یێن پێشمه‌رگه‌ی و له‌شكری نه‌هاتیه دان
ئه‌ڤرۆ:
نوونه‌رێ هه‌ردو وه‌زاره‌تێن پێشمه‌رگه و ناڤخوه ل فه‌رمانده‌یا ئۆپه‌راسیۆنێن هه‌ڤپشك ل ئیراقێ، لیوا عه‌بدولخالق ته‌لعه‌ت راگه‌هاند، بۆ دابینكرنا بودجه‌ی بۆ هه‌ردو لیوایێن هه‌ڤپشك یێن پێشمه‌رگه‌ی و له‌شكرێ ئیراقێ دانوستاندن یێن هاتینه كرن، به‌لێ هه‌تا نوكه بریارا دووماهیێ ل سه‌ر نه‌هاتیه دان.
لیوا عه‌بدولخالق ته‌لعه‌ت گۆت” ئه‌وا باس لێ دهێته كرن كو بودجه بۆ هه‌ردو لیوایێن هه‌ڤپشك یێن پێشمه‌رگه‌ی و له‌شكرێ ئیراقێ هاتیه دانان هه‌تا نوكه بریارا دووماهیێ ل سه‌ر نه‌هاتیه دان و تنێ باس لێ هاتیه كرن و پێدڤی ب بریارا دووماهیێ یه”.
گۆت ژی” هه‌موو رێكار یێن ب دووماهی هاتین و تنێ كێشه دابینكرنا بودجه‌یه كو پێدڤیه بریار ل سه‌ر بهێته دان و كێشه ژی ئه‌وه حوكمه‌تا نوكه یا ئیراقێ شیانێن دابینكرنا بودجه‌ی نینه تاكو بریارێ بده‌ت و پێدڤیه حوكمه‌ته‌كا نوو بهێته پێكئینان”.
دو لیوایێن هه‌ڤپشك یێن پێشمه‌رگه‌ی و له‌شكرێ ئیراقێ بۆ ده‌ڤه‌رێن كوردستانی یێن ده‌رڤه‌ی ئیدارا هه‌رێمێ دێ هێنه دروستكرن كو دێ ب هه‌ڤپشكی وان ده‌ڤه‌ران ب رێڤه‌به‌ن و هه‌موو رێكار ژی یێن ب دووماهی هاتین و تنێ مایه بودجه بۆ بهێته ته‌رخانكرن.
