بریتانیا ب مەرج پشتەڤانیێ ل ریفراندۆما ھەرێما کوردستانێ دکەت
ئه‌ڤرۆ نيوز:
بالیۆزێ بریتانیا ل تورکیا دیار دکەت کو ھەکە ھەرێما کوردستانێ و بەغدا ب رێیا دانوستاندنان ئاریشێن د ناڤبەرا خوە دا چارە بکەن ئەو وەکو بریتانیا دێ پشتەڤانیێ ل ریفراندۆما ھەرێما کوردستانێ کەن، لێ نھا ژ بەر وان ئاریشان ئەو ل گەل ریفراندۆمێ نینن.
بالیۆزێ بریتانیا ل ئەنقەرە ریچارد موور پشکداری بەرنامەکا سیاسی یا کەنالێ CNN تورک بوو و دیار کر کو ئەو وەکو بریتانیا نھا ل گەل ریفراندۆما ھەرێما کوردستانێ نینن چونکو عیراق شەرێ داعشێ دکەت و ئاریشێن ناڤخوەیی یێن عیراقێ ژی گەلەکێ زێدە نە، ژ بەر ھندێ ژی ھەکە نھا ھەرێما کوردستانێ ژ عیراقێ جودا ببیت دێ ئاریشێن عیراقێ زێدەتر لێ ھێن و ئەو یەک دێ کارتێکرنێ ل ئێمناھیا دەڤەرێ ژی کەت و ژ بەر ھندێ ئەم نھا ل گەل ریفراندۆمێ نینین و گۆت: (بێگومان مە بەری نھا دیار کریە کو بابەتێ ریفراندۆمێ بابەتەکێ ناڤخوەیی و دڤێت عیراقی پێکڤە چارەسەر بکەن، ھەکە ھەرێما کوردستانێ و بەغدا ب رێیا دانوستاندنان ھەموو پرسێن خوە چارەسەر بکەن و بەغدا ژی رازی بیت ریفراندۆم بھێتە کرن وی دەمی ئەم ژی وەکو بریتانیا دێ پشتەڤانیێ ل ریفراندۆما ھەرێما کوردستانێ بکەین).
ناڤھاتی د بەردەوامیا ئاخڤتنا خوە دا ئەو یەک ژی نەڤەشارت کو ئەو رێزێ ل داخوازیێن خەلکێ کوردستانێ دگرین و دزانین کو ب سالانە کورد بۆ سەرخوەبوونێ شەری دکەن و گەلەک قوربانی داینە، لێ ھەکە ل گەل بەغدایێ نەگەھنە رێککەڤتنەکێ و پرسێن د ناڤبەرا خوە دا چارەسەر نەکەن رەنگە پشتی ریفراندۆمێ ئاریشێن ھەولێر و بەغدایێ زێدتر لێ بھێن و وی دەمی دێ ب رەنگەکێ خراب کاریگەریێ ل دەڤەرێ کەت و ژ بەر ھندێ مە دڤێت بەری ھەر تشتەکێ ھەر دو ئالی بزاڤێ بکەن کو ھەموو پرسگرێکێن د ناڤبەرا خوە دا دوور ژ شەری و ئالۆزیان و ب رێیا دانوستاندنێ چارەسەر بکەن و گۆت: (دڤێت کورد بزاڤێ بکەن کو بەغدایێ ل دۆر پرسا ریفراندۆمێ رازی بکەن، ھەکە ئەو یەک ھاتە کرن وی دەمی ئەز باوەرم دێ پرانیا وەلاتێن جیھانێ پشتەڤانیێ ل ریفراندۆمێ بکەن، راستە نھا ھەلویستێ گەلەک وەلاتان ل دۆر ریفراندۆمێ باشە و یێ ھندەک وەلاتان جارێ دیار نینە، لێ ئەز باوەرم ھەکە بەغدا رازی بیت دێ ھەلویستێ گەلەک وەلاتێن دی یێن جیھانێ ژی ل دۆر ریفراندۆمێ ھێتە گوھۆرین و ئەو یەک د بەرژوەندیا کوردان دایە، ژ بەر ھندێ ژی باشترە نھا کورد ب ھەموو رەنگەکێ بزاڤێ بکەن کو رزامەندیا بەغدایێ ل دۆر ریفراندۆمێ بدەستڤە بینن).
سەبارەت ب ھەلویستێ بریتانیا ل ھەمبەر رۆژئاڤایێ کوردستانێ ژی ناڤھاتی دیار کر کو بریتانیا نھا گرنگیێ ب شەرێ ل دژی داعشێ ددەت و ھێزێن کوردی ل سووریێ ب رەنگەکێ سەرکەڤتی شەرێ داعشێ دکەن و شیاینە گەلەک دەڤەران ژ دەستێ داعشێ دەربخینن و نھا مە دڤێت رەققە ژ دەستێ داعشێ رزگار بیت، بێگومان پشتی کو رەوشا سووریێ ئارام بوو وی دەمی مە دڤێت کورد ژی وەکو خەلکێن دی یێن سووریێ د سیستەمێ نوو یێ وەلاتی دا پشکدار بن و گۆت: (ئەم دزانین کو تورکیا ژ رەوشا نھا یا رۆژئاڤایێ کوردستانی دلگرانە، لێ دڤێت ڤێ یەکێ ژی قەبوول بکەین کو ئێدی رەوشا سووریێ وەکو جاران نابیت و باشترە تورکیا ژی خوە بۆ گوھۆرینێن نوو ل سووریێ ئامادە بکەت، چونکو مە دڤێت کورد ژی د سووریا نوو دا بگەھنە مافێن خوە و ئەم دزانین ھەکە کورد نەگەھنە مافێن خوە قەیرانا سووریێ دێ یا بەردەوام بیت).