برێت مەکگۆرک: هەلبژارتن پرسەکا ناڤخوەیی یا هەرێما کوردستانێ یە
ئەڤرۆ نیوز ، زنار تۆڤی:
هنارتیێ تایبەتێ سەرۆکێ ئەمریکا بۆ هەڤپەیمانیا ل دژی داعشێ ل عیراقێ رەت کر کو داخوازا پاشخستنا هەلبژارتنێن هەرێما کوردستانێ کربیت و راگەهاندیە ئەو بابەت پرسەکا ناڤخوەیی یە.
برێت مەکگۆرک، هنارتیێ تایبەتێ سەرۆکێ ئەمریکا بۆ هەڤپەیمانیا نێڤدەولەتی یا دژی داعشێ د ئەکاونتێ خوە یێ تویتەری دا راگەهاندیە، کو سەرۆک وەزیر نێچیرڤان بارزانی راست دبێژیت، وی داخوازا پاشخستنا هەلبژارتنێن پەڕلەمانێ کوردستانێ نەکریە، ژبەر کو ئەو پرسەکا ناڤخوە یە.
مەکگۆرکی د وێ تویتێ دا داخواز کریە، کو سەرکردێن هەرێما کوردستانێ و پەرلەمانێ کوردستانێ ل بەرچاڤ وەرگرتنا رەوشا عیراق و دەڤەرێ بڕیارێ ل سەر هەلبژارتنان بدەن.
دەمێ چەندین رۆژانە نووچەیەک ل هژمارەکا کەنالێن هەرێمێ و عیراقێ بەلاڤ بوویە، کو مەکگۆرکی داخوازا پاشخستنا هەلبژارتنێن هەرێما کوردستانێ ژ سەرکرداتیا پارتی دیمۆکراتی کوردستان کریە، لێ هەر زوو نێچیرڤان بارزانی، سەرۆک وەزیرێ هەرێما کوردستانێ، ئەو نووچە رەت کریە.
