بزاڤا خورتکرنا گەشتیارێن ئاینی دهێتەکرن
ئەڤرو نیوز ، نەوزاد هلوری:
ل هەموو جیهانێ مفایەکێ باش ژ جهێن ئاینی و مەزارگەهان دهێتە وەرگرتن بو مەرەما گەشت و گۆزار و راکێشانا گەشتیاران بو نافخوی ، دەستەیا گەشت و گوزارا هەرێما کوردستانێ ژی پلانەک هەیە بو ناساندنا جهێن ئاینیێن کوردستانێ.
دڤی واریدا ” نادر روستایی” ئاخفتنکەرێ دەستەیا گەشت و گوزارا هەرێما کوردستانێ بو ئەڤرو نیوز گۆت: ( ل هەموو جیهانێ جهێن ئاین و مەزارگەه و مەرقەد و گۆرێن مروڤێن چاک و پێغەمبەر و کەساتیان بوینە جهێن سەرەدانکەران و مفایەکێ باش ژلایێ گەشت وگۆزارێ ڤە بو وەلاتی و وەلاتیان هەیە ژبەرکو جهێن ئاینی ب رێزبەندا دوازدێ دهێن بۆ جهێن گەشت و گوزاریێ)
زێدەتر گۆت: (ل نافخوەیا هەرێما کوردستانێ 40 جهێن ئاینی هەنە کو پوتەکێ زور ژلایێ وەلاتیان ڤە پێ دهێتەدان ب شێوەیەک 20 ژ وان بۆ مەرەمێن گەشت و گوزارێ د باشن و هەموو مەرجێن گەشت و گوزارێ تێدا هەنە مینا مەزارگەهێن هندەک پێغەمبەران و بنگەهێن رەسەنێن ئاینیێن دن د هەموو ئولێن کو نها ل کوردستانێ هەی ژ ئیسلام و مەسیحیەت و ئێزدی و زەردەشتی و ئاینێن دن)
ل بارا پلانا وان بو بکارئینانا ئەڤان جهان بۆ مەرەمێن گەشت و گوزارێ ، روستای گۆت: (دچارچوڤێ بکارئینانا جهێن ئاینی بو مەرەمێن گەشت و گوزاری نابیت ئەو جهە بنەمایێن خوەیێن ئاینی ژ دەست بدەن ، دڤی واریدا دەستەیا گەشت و گوزار پتر ب رولێ ناساندن و نوژەنکرنێ رادبیت ، ژبەرڤێ گرنگە کو ئەم ژی وەکو هەرێما کوردستانێ پوتەکێ مەزن بڤێ یەکێ بدەین ، بەلێ قەیرانا دارای د نهادا کارتێکرنەکا زور هەیە ، ئەگەر قەیران نەمینیت دێ مەژی پروژە و بەرنامەیێن تایبەت هەبن)
