بزاڤا درێژكرنا ده‌مێ په‌رله‌مانێ عيراقێ دهێته كرن
ئه‌ڤرۆنيوز:
لايه‌نێن سياسى يێن عيراقى دبزاڤان دانه بۆ درێژكرنا ده‌مێ په‌رله‌مانێ عيراقێ بۆ سێ هه‌يڤێن دى، پشتى كو ل دووماهيا ڤێ هه‌يڤێ ژڤانێ وى يێ قانوونى ب دووماهى دهێت وژئه‌گه‌رێ كێشا ره‌تكرنا ئه‌نجامێن هه‌لبژارتنان ونه رۆهنيا ره‌وشا عيراقێ، دخوازن سێ هه‌يڤێن دى ژى ده‌مێ په‌رله‌مانى درێژ بكه‌ن.
عه‌بدولكه‌ريم عه‌بتان، په‌رله‌مانتارێ هه‌ڤپه‌يمانيا نيشتمانى يا شيعى بۆ (العربي الجديد) گۆت” ل دووڤ قانوونێ ودستوورى دشياندايه بۆ رێگريێ ل دروستبوونا ڤالاهيا دستوورى، ده‌مێ په‌رله‌مانى بهێته درێژكرن، ئه‌ڤه ژى ب گۆره‌ى مادێ 64 ژدستوورى كو ب رۆهنى ئاماژه پێدايه”.
عه‌بتانى زێده‌تر گۆت” ل ئه‌گه‌رێ درێژكرنا ده‌مێ په‌رله‌مانى، حوكمه‌تا عيراقێ ژى دێ بيته حوكمه‌ته‌كا كارپێكه‌ر ودێ كارى بۆ ئه‌نجامدانا هه‌لبژارتنه‌كا پاقژ كه‌ت وكۆمسيۆن ب تمامى دێ ژ كارێن خوه هێته دوورخستن، چونكى پشتى هه‌لبژارتنان، كۆمسيۆنێ هه‌لبژارتنان ب تمامى شكه‌ستن ئينا وهاككرنه‌كا مه‌زن بۆ سيسته‌مێ ئه‌لكترۆنى هاته ئه‌نجامدان”.
ژێده‌ره‌كى ژ هه‌ڤپه‌يمانيا نيشتمانى بۆ رۆژناما ناڤبرى دياركر كو فراكسيۆنێن په‌رله‌مانێ عيراقێ داخواز ژ بسپۆرێن قانوونى كريه هوورده‌كاريا چاوانيا درێژكرنا ده‌مێ په‌رله‌مانى بۆ رۆهن بكه‌ن تاكو بزاڤێن خوه زێده بكه‌ن ل روونشتنا داهاتى يا په‌رله‌مانى ده‌مێ وى بۆ سێ هه‌يڤێن دى بهێته درێژكرن.