بزاڤا چاره‌كرنا كێشا گه‌شتێن ئه‌سمانى يێن نێڤده‌وله‌تى دهێته ئه‌نجامدان
ئه‌ڤرۆنيۆز:
وه‌زاره‌تا ڤه‌گۆهاستن وگه‌هاندنێ ل هه‌رێما كوردستانێ راگه‌هاند، هه‌تا نوكه چو فه‌رمانه‌ك بۆ ڤه‌كرنا هێلێن ئه‌سمانى يێن نێڤده‌وله‌تى بۆ وان نه‌هاتيه وجڤاتا وه‌زيرێن هه‌رێما كوردستانێ دبزاڤان دايه وێ كێشێ ل گه‌ل حوكمه‌تا به‌غدا چاره بكه‌ت.
ئومێد محه‌مه‌د په‌يڤدارێ وه‌زاره‌تا ڤه‌گۆهاستن وگه‌هاندنێ راگه‌هاند، پرسا راگرتنا هێلێن ئه‌سمانى يێن نێڤده‌وله‌تى يا ل جڤاتا وه‌زيران وچو دانوستاندنێ ژلايێ مه‌ڤه ل سه‌ر نه‌هاتيه كرن، چونكى پرسه‌كا سياسى يه، له‌وما پێدڤيه جڤاتا وه‌زيرێن هه‌رێمێ بزاڤێن خوه بۆ چاره‌كرنا وێ كێشێ بكه‌ت، ل دووڤ پێزانينان ژى، بزاڤ يێن كرين.
ل دۆر وێ چه‌ندێ ئومێده‌ك هه‌يه بۆ ڤه‌كرنا هێلێن ئه‌سمانى يێن نێڤده‌وله‌تى ل ڤان نێزيكان، په‌يڤدارێ وه‌زاره‌تا ڤه‌گۆهاستن وگه‌هاندنێ ل هه‌ريمێ بۆ باسنيۆز گۆت، هه‌تا نوكه چو فه‌رمان بۆ مه نه‌هاتينه ل دۆر وێ پرسێ.
دياركر ژى، راگرتنا هێلێن ئه‌سمانى يێن نێڤده‌وله‌تى ل هه‌رێما كوردستانێ ژ هه‌موو روويه‌كى كاريگه‌ريا خوه هه‌بوو وزيان ژى گه‌هانديه ب تايبه‌تى ژ روويێ گه‌شتكرنا وه‌لاتيان ڤه.
