بزاڤا گۆڕان: بەرھەم سالح ل بەغدا نوونەراتیا کوردان ناکەت
ئەڤرۆ نيوز:
پۆستێ سەرۆک کۆمارێ عیراقێ ب رێککەفتنا شیعە و سونە بەھرا پێکھاتێ کوردایە ل عیراقێ د حوکمڕانیا نوویا عیراقێ دا.
ددەما سێ خولێن بۆری دا ئە پۆستە ژئالیێ ئێکەتی نشتیمانی کوردستان ڤە ھاتیە برێڤەبرن، بەرپرسەکێ پلە بلندێ بزاڤا گۆڕان دبێژیت، ئەو کەسێن پۆستێ سەرۆک کوماریا عیراقێ کرین، نەشیاینە نوونەراتیەکا باش بۆ کوردان بکەن، مە دیت بەغدا بودجا ھەرێما کوردستانێ بڕی و پتر ژ نیڤا ئاخا کوردستانێ ژی داگیر کر، ئەو کەس نەشیان ئێگ گۆتن ژی بێژن.
ئەندامێ جڤاتا نشتیمانیا بزاڤا گۆڕان نزار مەحمود بۆ رۆژناما ئەڤرۆ گۆت: د ھەر سێ خولێن بەرێ پۆستێ سەرۆک کورماێ عیراقێ بو کوردان بوویە، بەلێ نەشیان چو دەستکفتەکێ بۆ کوردان تێدا پەیدا بکەت، لەورا د خولا چارێ ژی دا بەرھەم سالح نەشێت چو دەستکەفتەکی تێدا پەیدا بکەت، نەخاسم نوکە بەرھەم سالح نوونەرێ کوردان نینە.
نوکە پڕانیا حزبێن کوردستانی بەرھەم سالح ب نوونەرێ کوردان وەک سەرۆک کۆمار نزانن، نزار مەحمود گۆت: وەک بزاڤا گۆڕان فڕاکسیۆنا مە دەنگ بۆ بەرھەم سالح و پۆستێ سەرۆک کوماری نەدایە، ب نوونەرێ کەردان ژی نزانین، مە بەری نوکە راگەھاندیە، کو دەنگێ ب نوونەرێن پارتی و ئێکەتیێ دناڤا ھولا پەرلەمانی عیراقێ دا نادەین.
بەھرەم سالح بۆ ھەلبژارتنا (5/12) یا جڤاتا نوونەرێن عیراقێ، قەبارەکێ سیاسی دروستکر و راگەھاند، ئێکەتیێ پۆستێ سەرۆک کۆماری و سکرتێرێ گشتی یێ ئێکەتێ دانە من بەلێ من قەبوول نەکرن، بەلێ لیستا بەرھەمی شکەستن خوار، و ھەر زوی بەرھەم سالح داخواز ژ ئێکەتیێ کر، جارەکا دیتر ڤەگەریت و ببیتە سەرۆک کۆمارێ عیراقێ.
نزرا مەحمود ئاماژەدا وی بابەتی گۆت: دەمێ چار سالێن بۆری ئێکەتیێ بەرھەم سالح نەکریە سەرۆک کۆمار لەورا وی حزبەک دروستکر، کو بشێت بڤێ رێکێ دەنگێن زێدەتر ب دەستخوڤە بینیت، و ببیتە سەرۆک کۆمار، بەلێ حزبا وی شکەستن خوار، و ھەر زوو ڤەگەریا دناڤا ئێکەتیێ دا، دا کو پۆستێ سەرۆک کۆماری وەربگریت.
ھەروەسا نزار مەحمود دبێژت، ئەم وەکی گۆڕان چو بھایەکی بۆ پۆستێ سەرۆک کۆماری عیراقێ نزانین، ھەر وەکی بەھرەم سالحی بخوە گۆتیە ئەو بتنێ نوونەرێ ئێکەتیێ یە، نەک نوونەراتیا کوردان دکەت، دیارە بەرھەم سالح ھەڤپەیمانی بۆ پۆستێ سەرۆک کۆماری دروستکر بوو، ھەر بۆ وی پۆستی دووماھی ب حزبا ھەڤپەیمان و ھەڤالێن خوە ئینان و بجە ھێلان، بتنێ بەرھەم سالح شەرێ پۆستێ سەرۆک کۆماری دکر.
ئەندامێ جڤاتا نشتیمانیا بزاڤا گۆڕان دووپاتکر، بەھرەم سالح چو دەمەکێ خودان پارنسیب نەبوویە، بتنێ باوەری ب تشتەکێ ھەیە شەڕی بۆ پۆستێ خوە بکەت، ئەو بەرھەم سالح کری دژیانا سیاسیا جیھانێ دا مە نەدیتیە، کو وان ھەموو دروشمان بەلاڤ بکەت، پاشی روویێ خوەیێ راست دەربێخیت و گەلەک ب شەکستی جارەکا دیتر ڤەگەریت ناڤا ئێکەتیێ.
سەبارەت سەرکەفتنا بەرھەم سالحی د پۆستێ خوەدا، ناڤبری گۆت: بەرھەم سالح یێ سەرکەفتی نابیت د پۆستێ سەرۆک کۆماری دا، چونکی نوونەراتیا مللەتێ کورد ناکەت، ھەر ئەو کەسبوون یێن بەری نوکە نەشیان کێشێن کوردان ل گەل بەغدا چارە بکەن، بگرە ژ بڕینا مووچان و بجھنەئینانا مادێ 140 ، و بودجا پێشمەرگەی، و ھەتا دووماھیێ ژی نەشیان بتنێ ئێک پەیڤ ژی ھەمبەری بەغدا بێژن.