بزاڤه‌كا نوو یا سیاسی ل رۆژئاڤایێ كوردستانێ هاته ئاڤا كرن
ئه‌ڤرۆ:
بزاڤه‌كا نوو یا سیاسی ل رۆژئاڤایێ كوردستانێ هاته ئاڤا كرن و سه‌رۆكێ وێ بزاڤێ ژی دیار دكه‌ت كو وان دڤێت كار بكه‌ن دا ئاسته‌نگیێن ل هه‌مبه‌ر ئێكگرتنا كوردان ل رۆژئاڤایێ كوردستانێ نه‌مینن و هه‌روه‌سا كارێ وان دێ د چارچۆڤێ بزاڤه‌كا سیاسی دا بیت و وان نه‌ڤێت ببنه پارته‌كا سیاسی.
بزاڤه‌كا نوو یا سیاسی ب ناڤێ خوه‌بوون ل رۆژئاڤایێ كوردستانێ هاته ئاڤاكرن و سه‌رۆكێ وێ بزاڤێ ژی دیار دكه‌ت كو ئارمانجا وان ئه‌وه كار بكه‌ن دا هێزێن سیاسی یێن رۆژئاڤایێ كوردستانێ نێزیكی ئێكتر ببن و ئاسته‌نگیێن هه‌نه ژی بهێنه چاره‌سه‌ر كرن و وان نه‌ڤێت ببنه پارته‌كا سیاسی، به‌لكو ئارمانجا وان یا سه‌ره‌كی ئێكه‌تیا پارتێن سیاسی ل رۆژئاڤایێ كوردستانێ یه.
عه‌بدولباقی یوسف سه‌رۆكێ بزاڤا خوه‌بوون بۆ ده‌زگه‌هێن راگه‌هاندنێ دیار كرن كو بزاڤا خوه‌بوون دڤێت ل رۆژئاڤایێ كوردستانێ ده‌ست ب خه‌باته‌كا نوو بكه‌ت، وان دڤێت ل سه‌ر بنه‌مایێ نه‌ته‌وه‌ی كار بكه‌ن، بزاڤا خوه‌بوون نه‌ڤێت ببیته پارته‌كا سیاسی لێ د هه‌مان ده‌می دا وان دڤێت د مه‌یدانا سیاسه‌تێ دا ئه‌كتیڤ بن و گۆت: (نها گه‌له‌ك ئاسته‌نگی ل هه‌مبه‌ر ئێكگرتنا هه‌ر دو جڤاتێن كوردی یێن رۆژئاڤایێ كوردستانێ هه‌نه، مه دڤێت كار بكه‌ین دا ئه‌و ئاسته‌نگی نه‌مینن، مه دڤێت ده‌لیڤه‌یێن نوو بۆ ئێكگرتنا هێزێن سیاسی ل رۆژئاڤایێ كوردستانێ دروست بكه‌ین، چونكو نها پتر ژ هه‌ر ده‌مه‌كێ پێدڤیا كوردان ب ئێكگرتنێ هه‌یه، بزاڤا خوه‌بوون ژی ل سه‌ر ڤێ بنه‌مایێ هاتیه ئاڤاكرن و دێ كار و خه‌باتا مه ژی بۆ ئازادیا گه‌لێ كوردستانێ و ئێكگرتنا هه‌موو هێز و ئالیێن سیاسی یێن رۆژئاڤایێ كوردستانێ بیت).
سه‌رۆكێ بزاڤا خوه‌بوون ئه‌و یه‌ك ژی دیار كر كو ئاسته‌نگیێن مه‌زن ل پێشیا خه‌باتا سیاسی ل رۆژئاڤایێ كوردستانێ هه‌نه، ب تایبه‌تی ژی هه‌ر دو جڤاتێن كوردی یێن رۆژئاڤایێ كوردستانێ ژێك دوور كه‌فتینه و مه دڤێت ده‌ست ب قۆناغه‌كا نوو بهێته كرن دا ئاریشێن هه‌ی ب رێیا دانوستاندنان بهێنه چاره‌سه‌ر كرن.
د ڤێ ده‌ربارێ دا نڤیسه‌ر و چاڤدێرێن سیاسی ل رۆژئاڤایێ كوردستانێ دیار دكه‌ن كو ئاڤابوونا بزاڤه‌كا نوو وه‌كو خوه‌بوون بۆ رۆژئاڤایێ كوردستانێ تشته‌ك باشه لێ بزاڤه‌كا وه‌سا نوو نه‌شێت هه‌ر دو جڤاتێن كوردی یێن رۆژئاڤایێ كوردستانێ نێزیكی هه‌ڤدو بكه‌ت، چونكو به‌ری نها ئه‌مریكا و فره‌نسا گه‌له‌ك ده‌ستپێشخه‌ری كرن لێ ژ به‌ر هه‌لوه‌ستێ خراب یێ په‌كه‌كێ و ده‌ستێوه‌ردانێن وێ دانوستاندنێن د ناڤبه‌را هه‌ر دو جڤاتێن كوردی یێن رۆژئاڤایێ كوردستانێ دا هاتینه راگرتن، ژ به‌ر هندێ ژی بزاڤه‌كا نوو وه‌كو خوه‌بوون ب ساناهی نه‌شێت هه‌ر دو ئالیان نێزیكی هه‌ڤدو بكه‌ت لێ هه‌ر بزاڤه‌كا سیاسی ل رۆژئاڤایێ كوردستانێ بۆ ئێكگرتنا گه‌لێ كورد خه‌باتێ بكه‌ت دێ خه‌لك ژی پشته‌ڤانیێ لێ كه‌ن و ئاڤابوونا خوه‌بوونێ پێنگاڤه‌كا گرنگه بۆ خه‌باتا سیاسی یا گه‌لێ كورد ل رۆژئاڤایێ كوردستانێ.
ئه‌و یه‌ك د ده‌مه‌كێ دایه كو به‌ری نها گه‌له‌ك جاران سه‌ركردێن ئه‌نجوومه‌نێ نشتیمانی یێ كوردی ل سووریێ دیار كرینه كو ئه‌و به‌رهه‌ڤن هه‌موو ئاریشێن هه‌ی ل گه‌ل ته‌ڤده‌مێ چاره‌سه‌ر بكه‌ن لێ دڤێت به‌ری هه‌ر تشته‌كێ ته‌ڤده‌م و په‌یه‌ده رێزێ ل هه‌موو پارتێن دی یێن كوردی بگرن و ئاسته‌نگیان ل هه‌مبه‌ر خه‌باتا سیاسی یا پارتێن كوردستانی ل رۆژئاڤایێ كوردستانێ دروست نه‌كه‌ن، هه‌روه‌سا دڤێت هه‌موو ئه‌ندامێن پارتێن دی یێن كوردستانی كو به‌ری نها ژ ئالیێ په‌یه‌دێ ڤه هاتینه گرتن ژی بهێنه ئازاد كرن.
