بزاڤ بۆ كێمكرنا بهایێ په‌نزینێ دێ هێنه كرن
ئه‌ڤرۆ نیۆز، رێوار مزیری:
سه‌رۆكێ لیژنا قانوونی و هێزێن ناڤخۆ ل جڤاتا پارێزگه‌ها دهۆكێ بۆ ئه‌ڤرۆ نیۆز دیار كر كو بهایێ لترا په‌نزینێ ل سه‌رانسه‌ری هه‌رێما كوردستانێ گرانبوویه نه‌بتنێ ل پارێزگه‌ها دهۆكێ و گۆت: “نابیت ل وه‌لاته‌كێ خودان په‌ترۆل، بهایێ لترا په‌نزینێ وه‌كو وه‌لاته‌كی بهێته فرۆتن كو چو په‌ترۆل لێ نه‌بیت”.
ئدریس هه‌ركی، سه‌رۆكێ لیژنا قانوونی و هێزێن ناڤخۆ ل جڤاتا پارێزگه‌ها دهۆكێ ئاشكرا كر كو ژ ئه‌گه‌رێ بلندبوونا بهایێ په‌ترۆلێ ل جیهانێ بهایێ لترا په‌نزینێ ل سه‌رانسه‌ری هه‌رێما كوردستانێ گرانبوویه نه‌بتنێ ل پارێزگه‌ها دهۆكێ و هه‌ر لتره‌كا په‌نزینێ 50 دینار لێ هاتینه زێده‌كرن و گۆت: “دڤێت پێرابوونێن قانوونی هه‌مبه‌ر خودانێن وان په‌نزینخانان بهێنه وه‌رگرتن یێن كو په‌نزین ب ئه‌رزانی كری و ده‌مێ بهایێ لترا په‌نزینێ گرانبووی ئه‌و په‌نزینا عمباركری ب گرانی فرۆتی”.
ناڤهاتی ئاماژه دا وێ چه‌ندێ كو راسته سیسته‌مێ كرینا په‌نزینێ بازرگانی یه، به‌لێ دڤێت چاڤدێری ژ ئالیێ حوكمه‌تێ ڤه ل سه‌ر هه‌بیت و رێ یێن چاره‌سه‌ریێ بۆ ڤێ چه‌ندێ بهێنه دیتن، چونكی هه‌كه چاڤدێری نه‌بیت دێ بهایێ لترا په‌نزینێ هه‌تا هزار دیناران ژی چیت و گۆت: “لژنا سۆته‌مه‌نیێ ل جڤاتا پارێزگه‌ها دهۆكێ ل سه‌ر گرانبوونا بهایێ په‌نزینێ یا ئاگه‌هداره و دێ بزاڤ هێنه كرن ئه‌ڤ بهایه بهێته كێمكرن، چونكی نابیت ل وه‌لاته‌كێ خودان په‌ترۆل، بهایێ لترا په‌نزینێ وه‌كو وه‌لاته‌كی بهێته فرۆتن كو چو په‌ترۆل لێ نه‌بیت”.
