بزاڤ دھێنەکرن بوردومانا فرۆکێن تورکیا ب قانوونەکێ بھێتە راگرتن
ئەڤرۆ نيوز، نەوزاد ھلۆری:
بەردەوامبوونا توپباران و بوردومانا فروکێن تورکیا بۆ دەڤەرێن جوداجودایێن ھەرێما کوردستانێ ب گشتی و دەڤەرا شێلادزێ ب تایبەتی ژبلی زیانێن ماددی و گیانی د ھەمان دەم دا، زیانێن زۆر بۆ سەر ژینگەھا ھەرێما کوردستانێ ژی ھەبویە ، وەلاتیێن دەڤەرێ ھوشداریێن توند ددەن لایەنێن پەیوەندیدار کو ئەگەر بوردومان بەردەوام بیت دێ رەوشا ژیانا وەلاتیان بەر ب ئاقارەکێ مەترسی ڤە چیت، و شارەزایێن نیڤدەولەتی و قانونی ژی دخوازن ئەڤ یەک ب دەرکرنا قانونەک نوو بھێتە راگرتن.
پارێزەر عومەر عەلی کو دھەمان دەم دا خەلکێ شێلادزێ یە دیارکر کو دنھا دا بوردمانێن سوپا و فروکێن تورکیا بو دەڤەرا نێروەورێکان مەزنترین کێشە و ئاریشە بەرامبەر ژیانا خەلکێ دەڤەرێ درۆستکریە و بۆ ئەڤرۆ نیوز گۆت: (نھا کێشا سەرەکی یا خەلکێ عەشیرەتێن رێکان، دوسکی و نێروەی ئەوە کو ل سالا 1979 دەما کو رژێما بەعس خەلکێ وان دەڤەران راکرین و ئیناینە دەڤەرا دەشتازێ و ل سیریێ و شێلادزێ و دێرەلوکێ و باگێرا و چەند دەڤەرێن دی ئاکنجیکرین ب شێوەیەکێ زوری و خەلکێ وان دەڤەران ل ھەموو مافێن وان بێ بەھرکرین، و ئەڤ یەک بو دەمەکێ زور بویە کێشە کو پرانیا وان بێ کار بمینن ئەڤە سەرەرای کو خەلک ھەژاربوویە، ژ بەر کو ل ڤان جھان کار نەبویە خەلک بکەن، دسەرڤێ یەکێ ژی دا نھا خەلکێ سڤێلێ ڤان دەڤەران بەردەوام دبنە ئارمانجا فروکێن تورکیا و دبنە قوربانی بێی کو چوو لایەن و حوکمەت ھەلویستەکێ جدی وەربگرن و خوە ل وان بکەت خودات و چوو تشت نەمایە ب ناڤێ ئارامیا دەڤەرێ بەلکو دەڤەر بوویە ململانا شەری و دەنگێ توپ و فروکان و گەلەک یا گرنگە کو ئێدی دەستھەلاتدارێن ھەرێمێ رولێ خوە ل بەغدا ببینن بۆ راگرتنا بوردومان و توپبارانا تورکیا بو دەڤەرێن مە و قەرەبویا چەندین سالان ژی بدەن وەلاتیان ، و زڤراندنا ئارامیا دەڤەرێن مە مینا ماددا 140 یا عیراقێ گرنگە، و زێدەباری ھەموو ئەڤان زیانێن ماددی و گیانی ، دھەمان دەم دا زیانێن زور یێن ژینگەھی ژی ل دەڤەرا مە ھاتینە ئەنجامدان مینا بومبەیێن کیمیایی کو کارتێکرن لسەر داروبار و بیستان و رەز و باغ و دارستانا دەڤەرێ ھەیە و کارتێکرنێ ل چاندن و ب خودانکرنا تەرش و کەوالی ژی ھەیە و کارتێکرن ل سەر دەروون و روحیەتا وان کەسان ژی ھەیە کو دچنە وان دەڤەران ب تایبەتی لسەر چاڤ و مێشکێ وان).
ئارام بالەتەی ئەندامێ نویێ پەرلەمانێ عیراقێ د سەرەدانەکێ دا بو شێلادزێ و ئەنجامدانا سمینارەکێ لسەر رەوشا داھاتیا ھەرێما کوردستانێ و روولێ کوردان د حوکمەتا داھاتیا عیراقێ دا، دبەرسڤا پرسیارەکا ئەڤرۆ ئەڤرۆ دا ل بارا وێ یەکێ ئەرێ لسەر چ بنەما دەڤەرا شێلادزێ ژلایێ فروکێن تورکیا دھێتە بومبەبارانکرن و خەلک دبیتە قوربانی و ھەتا کەنگی ئەڤ یەک دێ یا بەردەوام بیت و رولێ فراکسوونێن کوردی ل بەغدا دێ چ بیت بو راگرتنا بوردومانان ل دەڤەرێ؟، ناڤبری بۆ ئەڤرۆ نیوز گۆت: (بوردومانا فروکێن تورکیا و سوپایێ وان بو دەڤەرێن کوردستانێ دزڤریت بو سیاسەتا پاراستنا سنوور دناڤبەرا عیراق و تورکیا، بەلێ ژ بەرکو زیانا وێ بو ھەرێما کوردستانێ یە و خەلک دبیتە قوربانی پێدڤی یە ئەڤ یەک ل پەرلەمانێ عیراقێ بھێتە بەحسکرن و قانونەک نوو بھێتە دەرکرن بو راگرتنا ئەوان بوردومانان ، و دیسان پێدڤی یە لژنا کاروبارێن دەرڤەیێن عیراقێ بھێتە کاراکرن و روولێ خوە ب تمامی ببینیت داکو ئێدی ژ ئەڤرۆ وێڤە بوردومان بھێتە راگرتن و خەلک ژی نەبیت قوربانیێ سیاسەتا د ناڤبەرا تورکیا و عیراقێ ،و پێدڤی یە خەلکێ دەڤەرێ کو مافێ وایە بزڤرنەڤە سەر جە و وارێن خوە و دەست ب ژیانا خوە و خودانکرنا تەرش و کەوالی و چاندنێ بکەن).