بزاڤ دھێنەکرن کارگەھەکا داگرتنا فێقی ل دەڤەرا بەرواری بالا بھێتە دانان
ئەڤرۆ نیوز:
رێڤەبەرێ ناحیا کانی ماسێ بۆ رۆژناما ئەڤرۆ ئاشکرا کر کو سالانە ئەو ل گەل جۆتیار و جھێن پەیوەندیدار کۆم دبن، ژ پێخەمەت دیتنا رێ چارەیەکێ بۆ بەرھەمێ جۆتیارێن دەڤەرا بەرواری بالا، دا کو بەرھەمێ وان یێ چاندنێ ب ھەروە نەچیت و دبێژیت: “ئەم یێ بزاڤان دکەین ب رێیا سەرمایەدار و حوکمەتێ کارگەھەکا داگرتنا فێقی ب دانین”.
سامی ئوشانە گۆرگیس، رێڤەبەرێ ناحیا کانی ماسێ دیار کر، ل دەڤەرا بەرواری بالا گەلەک جۆرێن فێقی، وەکی: سێڤ، تری، خۆخ، ھژیر، ھنار و گەلەک جۆرێن دی ھەنە، لێ ھەر سال رێژەکا مەزن یا ڤی فێقی ب ھەدەر دچیت و حەقێ زەحمەتا جۆتیاران دەرناکەڤیت و گۆت: “ب مەرەما ھاریکاریکرنا جۆتیاران، دا کو بەرھەمێ وان ئەم یێ بزاڤان دکەین ل گەل وەزارەتا کار و کاروبارێن جڤاکی و وەزارەتا چاندنێ کو کارگەھەکا داگرتنا فێقی ل دەڤەرا بەرواری بالا بھێتە دانان، دا کو ھاریکاریا جۆتیاران بکەین و فێقی و زەحمەتا وان ب ھەدەر نەچیت”.
خویا ژی کر، بۆ ڤێ مەرەمێ شاندەکێ وەزارەتا چاندنێ سەرەدانا دەڤەرێ کریە و جھەک بۆ دانانا کارگەھا داگرتنا فێقی ل سنوورێ ناحیا کانی ماسێ ھاتیە دەستنیشانکرن و گۆت: “مە دانوستاندن ل گەل ھندەک جۆتیار و سەرمایەدارێن ڤێ دەڤەرێ کرینە، کو ئەو ژی ل گەل حوکمەتێ د دانانا کارگەھەکا داگرتنا فێقی دا پشکدار بن، وەکی کەرتەکێ تێکھەل کو حوکمەت و کەرتێ تایبەت پێکڤە وێ کارگەھێ برێڤە ببەن”.
رێڤەبەرێ ناحیا کانی ماسێ ئاماژە ب وێ چەندێ ژی کر، ئەو بەردەوام یێ بزاڤان دکەن کارگەھەکا داگرتنا فێقی بیننە دەڤەرا بەرواری بالا و گۆت: “مەرەما مە ئەوە، جۆتیارێن مە مفای ژ بەرھەمێ خوە ببینن و ئێدی داھاتەکێ باش بۆ وان ژ چاندنێ بھێت، چونکی ھەکە ھەر سال بەرھەمێ وان ب ھەدەر بچیت، ئێدی جۆتیار نەشێن بەردەوامیێ بدەنە کارێ خوە یێ چاندنێ و ھیڤیێن وان ئێدی ب چاندنێ نامینن و دێ زیان گەھیتە کەرتێ چاندنێ ل ڤێ دەڤەرێ”.