بسپۆرەكێ ئابۆری: ڕێككەفتنا پەترۆلێ د ناڤبەرا بەغدا و هەرێمێ دا مفایەكێ مەزن هەیە بۆ هەردو ئالیان
ئەڤرۆ
هەولێر، سولین سلێمان
پسپۆرەكێ ئابۆری ڕادگەهاند، پشتی كو بڕیارا دادگەها پاریس هاتیە پەسەندكرن و هنارتنا پەترۆلا هەرێما كوردستانێ ب ڕێكا توركیا هاتیە ڕاگرتن ڤێ چەندێ زیان ب ڕێژەیا ملیار دۆلاران ب داهاتێ هەرێما كوردستانی گەهاندیە، ئاماژەكر ژی ئەو ڕاگرتن نە یا بەردەوامە و دەمێ دووبارە دەست ب هنارتنا وێ دهێتە كرن ل دووڤ ڕێككەفتنا بەغدا و هەولێرێ دێ ب شێوازەكێ بەرفرەهتر و ڕێكوپێكتر هێتە هنارتن.
د. ئدریس ڕەمەزان كۆچەر، پسپۆرێ ئابۆری و مامۆستا ل كۆلێژا كارگێری و ئابوری د دیدارەكێ دا بۆ ڕۆژنامەیا (ئەڤرۆ) گۆت: ڕاگرتنا هنارتنا پەترۆلا هەرێما كوردستانێ ب ڕێكا توركیا یا دەمكیە و نە ڕاگرتنەكا بەردەوامە چونكی ئەڤ پەترۆلە د دەمێ خوەدا دوبارە دێ دەست ب هنارتنێ كەت د بن ڕۆناهیا بنەمایێن وێ ڕێككەفتنا د ناڤبەرا بەغدا و حوكمەتا هەرێما كوردستانێ دا هاتیە كرن، چونكو ئەڤ ڕێككەفتنە د بەرژەوەندیا هەردو ئالیان دایە».
ڤی پسپۆرێ ئابۆری دیاكر ژی» دگەل دوبارە دەستپێكرنا هنارتنا پەترۆلا هەرێما كوردستانێ دێ ڤێجارێ ب شێوازەكێ بەرفرەهتر و ڕێكوپێكتر هێتە هنارتن و بهایێ پەترۆلێ ژی دێ گرانتر بیت ب ڤی شێوازی داهاتێ هەرێما كوردستانێ ژی دێ زێدەبیت».
ئاماژەكر: ڕێككەفتنا د ناڤبەرا حوكمەتا فیدرالی و هەرێما كوردستانێ دا مفایەكێ مەزن بۆ هەردو ئالیان هەیە ب مەرجەكی هەردو پێگیر بن ب وێ ڕێككەفتنێ ، ژئالیەكی دی ڤە هەردەم حوكمەتا هەرێما كوردستانێ دگەل ڕێككەفتنێ بوویە دگەل ئێراقێ لێ وان ب بهانەیێن جودا خوە ل ڕێككەفتنان ڤەدزیە، د وان سالێن بۆری دا مە دیت كو ژ بەر نە هنارتنا پشكا هەرێما كوردستانێ، حوكمەتا هەرێمی نەچار بوو ئەو ب خوە پەترۆلا خوە بفرۆشیت وئەو داهاتێ دەست دكەڤیت تەرخان بكەت بۆ دانا موچەیێن فەرمانبەرێن هەرێما كوردستانێ.
