بسپۆرەکێ ئەمریکی: پەیوەندیێن تورکیا و ئەمریکا وەکو جاران نامینن
ئەڤرۆ نيوز:
ژۆشوا لاندیس بسپۆرێ ئەمریکی د کاروبارێ رۆژھەلاتا ناڤین بۆ رۆژناما واشنتۆن پۆست یا وی وەلاتی دیار کریە کو ئاڤاکرنا ھێزەکا سی ھزار کەسی ژ کوردێن سووریێ ب دەستێ ئەمریکا و پشتەڤانیا بەردەوام یا ئەمریکا بۆ کوردێن سووریێ ڤێ یەکێ نیشا ددەت کو ئێدی پەیوەندیێن تورکیا و ئەمریکا وەکو جاران نامینن و بەری ھاتنا ترامپی ژی گەلەک بەرپرسێن ئەمریکی دیار کربوون دڤێت ئەمریکا ھەموو پەیوەندیێن خوە ل گەل تورکیا رابگریت.
ناڤبری ئەو یەک ژی دیار کریە کو دەمەکە سەرۆک کۆمارێ تورکیا رەجەب تەیب ئەردۆگان ب رەنگەکێ ئاشکرا گەفان ل ئەمریکا دکەت، ئەو یەک ژی نیشانا ھندێ یە کو تورکیا ژ سیاسەتا ئەمریکا ل ھەمبەر کوردێن سووریێ دلگران بوویە و ژ بەر ھندێ ژی دخوازیت ھێرشی عەفرینێ بکەت، بەری نھا ژی چەندین فەرماندارێن ئەمریکی دیار کربوون ھەکە تورکیا ھێرشی عەفرینێ بکەت رەنگە ئەو یەک ببیتە روودانا شەرێ ئەمریکا و تورکیا، چونکو نھا لاوازبوونێ پێگەھێ کوردان ل سووریێ دھێتە رامانا لاوازیا ئەمریکا ل سووریا نوو، ژ بەر ھندێ ژی ئەمریکا نەچارە ب ھەموو رەنگەکێ پشتەڤانیێ ل کوردێن سووریێ و ھێزێن وان یێ سەربازی بکەت و وان ب تنێ نەھێلیت.
بسپۆرێ ئەمریکی ھەروەسا دبێژیت ئێدی پەیوەندیێن تورکیا و ئەمریکا گەلەکێ ئالۆز بووینە و ھەر دو وەلات ژی ڤێ راستیێ باش دزانن، ئەمریکا ژی نەچارە بۆ پاشەرۆژا بەرژەوەندیێن خوە پێداچوونێ د پەیوەندیێن خوە ل گەل تورکیا بکەت.
