بسپۆرەکێ پەیوەندیێن دەرڤە: سێ بەربژارێن سەرۆکاتیا ئەمریکا راستەوخوە پشتەڤانیا دەولەتا کوردی دکەن
ئەڤرۆ:
سەرەدانا سەرۆکێ ھەرێما کوردستانێ ب سەرۆکاتیا شاندەکێ بلند بۆ ئەمریکا و کۆمبوون ل گەل بەرپرسێن بلندێن وی وەلاتی کارڤەدانێن جودا جودا ل پشت خوە ھێلاینە، مامۆستایەکێ زانکۆیێ ژی وێ سەرەدانێ ب گرنگی ل قەلەم ددەت و ڤێ یەکێ ژی بۆ چەندین ئەگەران دزڤرینت.
سەردار موسا شەریف بسپۆرێ پەیوەندیێن دەرڤە بۆ رۆژناما ئەڤرۆ گۆت”پشتی دامەزراندنا حوکمەتا ھەرێما کوردستانێ ل پشتی سەرھلدانێ پەیوەندیێن کوردان ل گەل ئەمریکا پتر فەرمی ب خوە ڤە دیتی یە، پووتەدان و رۆلێ ئەمریکا بۆ رێکخستنا مالا کوردی ل شەرێ ناڤخوەیی دیاربوو، ل ١٨ ئیلۆنا ١٩٩٨ ل بن چاڤدێریا وەزیرا دەرڤە رێککەفتنەک ھاتبوو ئیمزاکرن، ئەڤە بوونە ھۆکار کو ئەمریکا گرنگیێ ب کوردان بدەت وەک فاکتەرەکێ خودان قەوارە ل رۆژھەلاتا ناڤین دبینیت، قۆناغا دویێ یا وان پەیوەندیان دەمێ بەرھەڤیێن پرۆسا ئازادکرنا عیراقێ، قۆناغا سیێ پشتی ژناڤچوونا رژێما بەعس و دارێتنا دستوورەکێ نوو، قۆناغا دویێ وسیێ پەیوەندیێن ھەرێما کوردستانێ گەھشتنە ئاستەکێ بلند و ژ فاکتەرێن پالدەر بۆ ڤێ چەندێ، دەمێ ل کۆچکا سپی ل سالا ٢٠٠٥ جورج بۆشێ سەرۆکێ ئەمریکا پێشوازی ل سەرۆک بارزانی کری”.
د. سەرداری گوت ژی” ئەمریکا دڤیا عیراقێ ئاڤا بکەت و ببیتە نموونە ل سەر ئاستێ رۆژھەلاتا ناڤین، کاودانێن سیاسی یێن عیراقێ و رۆژھەلاتا ناڤین نەھێلا ئەڤ خەونە ببیتە راستی، کورد دڤێ گێلەشوکێ دا بوونە باشترین ھەڤال بۆ ڤی وەلاتی، ئاستێ پێشوازیکرنێ ل سەرۆکێ ھەرێما کوردستانێ، د وارێ پرۆتوکۆلی دا، ھەکە سەحکەینێ سەرەدانا سەرۆکێ ھەرێما کوردستانێ یا ئەڤ جارە جوداھی یا ھەی ژ یێن بۆری، چونکی شیرەتکارێ ئاسایشا ھەرێما کوردستانێ و وەزیرێ پێشمەرگەی ل گەل دانە، دیسان لایەنێن کۆمبوون ل گەل دھێنە ئەنجامدان جھێ گرنگیێ نە بۆ ھەرێما کوردستانێ و رۆژھەلاتا ناڤین بۆ پێگەھا ھەرێما کوردستانێ، دیسان ل سەر ئاستێ نێڤدەولەتی کو نوکە شەرەکێ بەرفەرەە ب نوونەراتیا ھەڤپەیمانیا نێڤدەولەتی یێ ھەرێما کوردستانێ دژی داعشێ دکەت، دڤێت ئاماژە ب ڤێ یەکێ بھێتەکرن، چو جاران وەکی نوکە بابەتێ ھەرێما کوردستانێ د سیاسەتا ئەمریکا دا نەھاتیە بەحسکرن، نوکە ھەر چار بەربژارێن سەرۆکاتیا ئەمریکا کو سێ ژوانا راستەوخوە ئاماژە و پشتەڤانیا دەولەتا کوردی دکەن، ئێک ژی داخوازا پشتەڤانیا نێڤدەولەتی بۆ ھەرێما کوردستانێ دکەت”.
ھێشتا ژی گۆت” بریارا کونگرێسێ ئەمریکی یا ھنارتنا چەکی بۆ کوردستانێ گرنگی دانێ ب ھەرێما کوردستانێ نیشاددەت و ھەموو ئەڤ ھەلویستێن کەساتیێن ئەمریکی کارڤەدان یێن ھەین ل سەر شێوێ بیرکرنا سەرکردێن سیاسی ل رۆژھەلاتا ناڤین ل سەر کێشا کوردی”.
ناڤبری ئاماژە دا وێ چەندێ کو بابەتەکێ گرنگتر و جوداتر ھەیە ژ سەرەدانێن دی یێن سەرۆکێ ھەرێما کوردستانێ بۆ ئەمریکا ئەوژی ئەوە، کو سەرۆکێ ھەرێمێ راستەوخوە دێ بەحسێ دەولەتا کوردی کەت، ئانکو ژ ئەڤرۆ پێڤە سەرۆکێ ھەرێما کوردستانێ بابەتێ دەولەتا کوردی یێ کریە تەوەرەکێ ستراتیژی د سیاسەتا دەرڤە و دبلوماسی یا کوردی دا.
ب دیتنا ناڤبری” گۆرانکاریێن بنەرەتی سەبارەت دەولەتا کوردی ل رۆژھەلاتا ناڤین ھاتینە مەیدانێ ، دیسان ل وەلاتێن عەرەبی ژی ھەمان بەحس دھێتەکرن و پشتەڤانی ژی یا بۆ ھەی، یا ژ ھەموویێ گرنکتر پشتەڤانی و داخۆیانیێن سەرکردێن بلندێن ئیسرائیلێ یە وەک سەرۆک کومار و سەرۆک وەزیران و وەزیرێ دەرڤە، پشتەڤانیا ئیسرائیلێ بۆ دەولەتا کوردی یا گرنگە، کارڤەدان و کاریگەریەکا مەزن یا ھەی ل بریارا ئەمریکا ل دۆر پاشەرۆژا کوردان”.
