بشار کیکی بەحس ل پشکداریا تورکیا و شەرێ ئازادیا مووسل دکەت
ئەڤرۆ نیوز:
سەرۆکێ جڤاتا پارێزگەھا نەینەوا بشار کیکی بۆ ئەڤرۆ دیارکرکو پتریا خەلکێ موسل ناخوازن ملێشیێن شیعی مووسلێ ئازاد بکەن و ئەڤە بابەتەکێ سیاسی یە دناڤبەرا سونە و شیعاندا و پێدڤیە ئازادکرنا نەینەوا ب ھەڤکاری بیت دناڤبەرا ھێزێن سونە و پێشمەرگەی وھەڤپەێمانیان و پێدڤیە عەرەبێن سونە ئەوێن دژی تیرۆرستان پشکداریەکا سەرەکێ دئیدارا ئەمنی ولەشکری دا بکەن ل پارێزگەھا نەینەوا.
بشار کیکی سەرۆکێ جڤاتا پارێزگەھا نەینەوا بۆ ئەڤرۆ دیارکر کو پێدڤیە حوکمەتا عیراقی گوھداریا داخوازیێن عەرەبێن سونە بکەت ئەوێن دژی تیرۆرستان کاردکەن وسونەیان تایبەتمەندیا خوە ھەبیت و رەوشا عەرەبێن سونە بۆ بەری 10/6/2014 نەزڤریت، چونکی پێدڤیە سونە پشکداریەکا سەرەکێ یا ئیداری وئەمنی ولەشکری ل پارێزگەھا نەینەوا ھەیت، ھەتا نوکە حوکمەتا عیراقێ نەشیت خوە بپارێزیت، دێ چەوا شێت مووسلێ ئازاد کەت ب تایبەتی نەبوونا لەشکەرەکێ ڕێکخستی ونشتیمانیی.
کیکی ئەوژی خۆیا کر کو لەشکرێ عیراقێ 300 کیلومەتران ژ مووسلێ یێ دوورە ھەتا نوکە حوکمەتا عیراقێ یا بەرھەڤ نینە بۆ ئازادکرنا وێ، ئازادکرنا وی باژێری ب ھیڤیا حوکمەتا عیراقی ڤە بیت، دێ گەلەک گیرۆبیت، گوت ژی” پلانا ئازادکرنا مووسلێ یا ددەستی حوکمەتا ھەرێمێ و ھەڤپەیمانان و حوکمەتا عیراقێ دایە ئەو دێ دەست نێشان کەن گەنکی دەست پێ بکەن”.
ب دیتنا سەرۆکێ جڤاتا پارێزگەھا نەینەوا، پێدڤیە مفا ژ تورکیا بھێتە وەرگرتن بۆ بابەتێن لەشکری، بگرە ژ مەشقدانێ، مە پیزانێن ل سەر ھاتنا لەشکری تورکی ھەبوون کو ھژمارەکا راھێنەرێن لەشکری بوون کو ددەمێ خوەدا دا ئەسیل نوجیفی داخواز کربوو وحوکمەتا عیراقی ئاگەە ژێ ھەبوو وگەلەک یا جھێ خوەدا دچارچۆڤێ نێڤدەولەتی دا ھاتنا لەشکری تورکی بھێتە بەحسکرن و مفا ژی بھێتە وەرگرتن بۆ ئازادکرنا مووسلێ وتورکیا دخوازیت ڕۆل د ئازادکرنا مووسلێ دا ھەبیت و ل دووڤ وان دیدارێن مە ل گەل بەرپرسێن تورکی کرین، تورکیا یا بەرھەڤە ب ھەر شێوەکێ ھەبیت پشکداریێ د ئازادکرنا مووسلێ دا بکەت.
بشار کیکی گۆت ژی حازرێن حوکمەتا عیراقێ بۆ ئازادکرنا مووسلێ درێکخستی نینن و عیراقێ نەشیا کونترۆلا ڤێ رەوشێ بکەت چونکی دبنیاتدا تینەگەھشتی یە کو کێشەکا سیاسی یا ھەی و سوونە دخوازن ڕۆلێ خوەیێ کاریگەر ل دەڤەرین خوە ھەبیت و ئەو بالە دەست بن و بەغدا ب ڤێ ڕەنگی ڕەفتار ل گەل سونەیان نەکر، لەوما مووسل و رومادی وچەندین دەڤەرێن دێ تووشی ھەرفتنێ بوون، ھەکە سونە بالە دەست بن، چو دەلیڤە بۆ تیرۆرستان نامینن مفای ژ ڤێ ڕەوشێ وەربگرن.
ناڤبری ئەوژی گۆت: ب شیوەکێ مەزن تیرۆرستێن داعشێ یێن لاواز بووین ھەکە ھەر ھاریکاریەکا باشتر بۆ پێشمەرگەی بھێتە کرن ل گەل خوەبەخش و حەشدا وتەنی وچەکدارێن عەشیرەتان مفا ژ ڤان ھەموویان بھێتە وەرگرتن و عەرەبین سونە یێن مەخموور و زیلکان ھەموو پێکڤە بھێنە ڕێکخستن ب ھەڤکاریا ھیزێن پێشمەرگەی، دێ مووسل ھێتە ئازادکرن ونوکە پتریا خەلکی مووسل و نەینەوا دپەشیمانن ژ ھاتنا تیرۆرستان بۆ ناڤ سەنتەری َ نەینەوا و حەز دکەن رەوشا نەینەوا بھێتە گوھۆرین، چونکی ئەو ھزرا خەلکێ بۆ داعشێ دکر وەسا نە دەرکەڤت و نوکە ب ھەموو شێوەیان تیرۆرست یێ زۆرداریێ ل خەلکێ مووسلێ دکەن.