بلا گەشتیار چاڤ ل مە بكەن نە بەروڤاژی بیت
بێوار حەمدی
مرۆڤ ب ب دو تشتان دەربرینێ ژ وەلاتێ خوە دكەت، ئێك ژوان: رەوشت و یا دووێ ژی : پاقژی، ئەگەر ل دەسپێكێ ئەم بەحشێ ناڤخوەییا وەلاتێ خۆ بكەین، جارێ پێدڤیە ئەم ڤان هەردو پەیڤان وەكو ناڤێ خوە ژبەربكەین. گەشتكرن كارەكێ نورمالە ول جیهانێ هەمیێ دهێنە كرن ئەڤجا چ گەشتێن ناڤخوەی بن یان ژی یێن دەرڤەی وەلاتی، بێگۆمان ئەم هەموو ئاگەهدارو ئاشنای وێ چەندێ ینە كو دەمێ دچینە سەیرانێ پێدڤیە پاقژی یا جهێ خوە رابگرین و ڕێزێ ل ژینگەها خوە بگرین، چونكو پاقژی رەوشتە، ئەگەر مرۆڤی رەوشت هەبیت بێگومان دێ كەسەك بت بێی كو ئێك بێژیتێ جهێ خوە پاقژبكە دێ وژداناوی وی ئاگەهداركەت، دیسا دەما كو مە رەوشت و پاقژی هەبن، ئەڤە دێ مفای ل مەكەت دەمێ دچینە گەشتەكا ژ دەرڤەی وەلاتێ خوە، میناك دەمێ دچینە گەشتەكا ژ دەرڤە و ئەم پاقژی و ڕێزا وی وەلاتی ژی وەكو وەلاتێ خوە بپارێزین ل ی دەمی ئەم یێ دەربرینێ ژ رەوشت و پەروەردەیا وەلاتێ خوە دكەین، لەوما ژی یا گرنگە ل دەسپێكێ ئەم ژینگەها خوە بپارێزین و رەوشتێ خوە ئاڤا بكەین، چونكو گەلەك ب نۆرمالی دەما كو گەشتیارەكێ بیانی دبینیت ئەم یێ بەرمایكەكێ د ناڤ جاما ترومبێلێ دهاڤێژینە ژدەرڤە، گومان تێدا نینە دێ ئەو كارە بۆ وی ب ساناهیتر لێ هێت كو ئەوژی وەبكەت، یان دەمێ دچیت سەرەدانا جهەكێ گەشتیاری یێ وەلاتێ مە دكەت و ببینیت كو بەرمایكێن گلێشی ل وێرێنە ئێكسەر دێ بۆ وی پتر دەرفەت چێبت كو گرنگیێ ب ژینگەهامە نەدەت، ب تایبەتی د ڤان سالێن دوماهیێ دا وەكو ئەم دبینین كو گەلەك گەشتیار سەرەدانا وەلاتێ مە دكەن داكو دەمێن خوە لێ ببۆرینن، بۆچی؟ ژبەركو كوردستان وەلاتێ جوانی و ئاڤەدانیێ و جهێن خوەش و گەشتیاریێ یە، گەلەك جاران ئەم خوە نەرازی دكەین دەمێ دبینین گەشتیارێن بیانی جهەكێ پیس كری یان بەرمایكێن خوە هێلاینە د ناڤ ئاڤێن پاقژ و دلڤەكەر دا، لەوما ژی بلا ئەم ببینە پێشەنگ ژبۆ هەركەسەكێ سەرەدانا مەدكەت، بلا ئەو گەشتیارە چاڤ ل مە بكەن دەمێ دبینن ئەم خودانێن وەلاتێ خوەینە و ژینگەها خوە پاقژ و بەرز رادگرین، نەكو بەروڤاژی بیت دەمێ دبینی ئەو یێ بێ ڕێزیێ دكەن یان كارەكی دكەن كو دگەل داب و نەریتێن وەلاتێ مە ناگونجیت چاڤ لێ بكەین، بەروڤاژی بلا ببینە هێمایێن پاراستنا ژینگەه و وەلاتێ خوە و نەبینە پاریەكێ ب ساناهی بۆ دەڤێ هیچ دوژمنەكێ ئاخا كوردستانێ.
