هەستێن كۆژەك
بێوار حەمدی
هەستێن مرۆڤی جیهانەكا ئالۆز و كورن، هندەك هەست هەنە وەكی رۆناهییێ ژیانا مرۆڤی گەش دكەن، بەلێ ب بەرۆڤاژی هەستێن دی ژی هەنە كو د سەری دا وەكی هەستێن ئاسایی دیار دبن، بەلێ د ناخێ خۆ دا هێدی هێدی رۆح و مەژیێ مرۆڤی وێران دكەن، ئەڤ هەستە د جیهانا دەروونناسیێ دا ب (هەستێن كۆژەك) دهێنە نیاسین، چنكو ب بێ دەنگی و بێی كو مرۆڤ تەنگاهیێ ب لەشێ خۆ بێژیت، شیانێن ویژدان، ئارامی و كەیفا ژیانێ ژێ دستینن، شێرپەنجەیا دەروونی یێ هەرە كۆژەك، حەسودی و چاڤەڕێیا نەساخلەمە، دەمژمێرا هەستا حەسودیێ د ناخێ مرۆڤی دا ڕادەوستیت و وێ چەندێ ژ بیردكەت كو هەر كەسەك و رێكا خۆ د ژیانێ دا هەیە. حەسود بەردەوام خۆ ب كەسێن دی ڕا بەراورد دكەت و ب سەركەفتنا خەلكی دئێشیت.
ئەڤ هەستە ژەهرەكا ڕاستەقینەیە، چنكو ڕێكێ نادەت مرۆڤ ب دەستكەفتێن خۆ خۆشحال ببیت، بەلكو بەردەوام هزر د وێ چەندێ دا دكەت كا خەلكی چ هەیە، یان ژی ب هندەك ئاخفتنێن دلئێش هەستێن مرۆڤی دكۆژیت و هیڤیێن مرۆڤی بن ئاخ دكەن، دبێژنە ڤان مرۆڤان ژی كەسێن ڕەشبین، هەستا دویێ كین و نە ئازادكرنا ڕابردوییە، دەمێ مرۆڤ ڕق و كینێ د دلێ خۆ دا كۆم دكەت، وەكی وێ چەندێ یە كو ب خۆ ژەهر ڤەخۆر دئینتە پێش و كەسەك دی ب وێ ژەهرێ بمریت! ژبیرنەكرنا خەلەتیێن خەلكی و هەلگرتنا بارێ ڕابردوی، گوشارەكا مەزن دئێخیتە سەر سینگ و هەناسا مرۆڤی و ئاسۆیا پاشەرۆژێ ل بەر چاڤان تاری دكەت، هەروەسا، ترسا نە ئاسایی ژ شكەستنێ هەستەكێ دی یێ ئیفلیجكەرە.
ئەڤ ترسە ڕێكێ ل مرۆڤی دگریت كو گاڤەكێ بەر ب پێشڤە ب هاڤێژیت، گۆمانێ د شیانێن خۆ دا چێكەت و مرۆڤی د چوارچۆڤەیەكێ تەنگ یێ بێهیڤیێ دا زیندان دكەت، ژبۆ ڕزگاربوونێ ژ ڤان هەستێن كۆژەك، مرۆڤ پێدڤی ب هشیاریا دەرونی هەیە.
قەبوولكرنا خۆ، پراكتیزەكرنا سوپاسگوزاریێ بۆ تشتێن بچووك و ئازادكرنا دل ژ ڕق و كینێ، تاكە دەرگەهن بۆ پاراستنا ناخێ مرۆڤی ژ ڤێ ژەهرا بێ دەنگ، ژیان گەلەك كورتترە ژ هندێ كو د زیندانا هەستێن تاری دا بهێتە بۆراندن.
