بهايێن ناڤ بازارى دێ هێنه رێكخستن
ئەڤرۆ نیوز:
ب مەرەما ئاگەھداربوون ل سەر رەوشا دام و دەزگەھێن حوکمەتا ھەرێما کوردستانێ و چەوانیا کاراکرنا سازیێن خزمەتکاری ل سەرانسەری پارێزگەھا دھۆکێ و کێمکرنا کاریگەریا قەیرانێ، دوھی 31/1/2016 پارێزگارێ دھۆکێ د گەل ھەموو قایمقام و رێڤەبەرێن گشتی یێن پارێزگەھا دھۆکێ کۆمبوو.
فەرھاد ئەمین ئەترووشی، پارێزگەرێ دھۆکێ دیار کر، ئەو قەیرانێن ب سەر ھەرێمێ دا ھاتین، وەکو: شەرێ تیرۆرستێن داعش، قەیرانا دارایی و ئابووری، گیروبوونا مووچان، نەھنارتنا بوودجێ ژ لایێ حوکمەتا عیراقێ ڤە و نزمبوونا بھایێ پەترۆلێ کارتێکرنەکا نەرێنی ل سەر ھەموو بیاڤێن ژیانێ و پرۆژێن خزمەتگۆزاری و ب جھئینانا پلانا پارێزگەھێ کریە، ھەروەسا بەحسی بزاڤێن حوکمەتا ھەرێما کوردستانێ کر بۆ دەربازبوون ژ ڤان قەیرانان.
ل دۆر رەوشا بازاری و کێمکرنا بھایان ژی پارێزگەرێ دھۆکێ گۆت: “پشتەڤانیا کارگێریا پارێزگەھێ بۆ ھەموو سەکتەرێن خزمەتکاری دێ یا بەردەوام بیت و ب ڤێ مەرەمێ لژنەک ل سەر ئاستێ ئەنجومەنێ وەزیران ھاتیە پێکئینان بۆ رێکخستنا بھایێن ناڤ بازاری”.
ل دووماھیا کۆمبوونێ دەرگەھێ دانوستاندنێ بۆ پشکدارێن کۆمبوونێ ھاتە ڤەکرن چەندین بووچوون و پێشنیار بۆ باشترکرنا رەوشا کاری و خزمەتا وەلاتیان ھاتنەکرن.
