بهایێ مامه‌له و سزایێن هاتنوچوونێ هاته زێده‌كرن
ئه‌ڤرۆ نیۆز، رێوار مزیرى:
رێڤه‌به‌رێ گشتى یێ هاتنوچوونێ ل هه‌رێما كوردستانێ ئاشكرا كر كو وه‌زاره‌تا ناڤخۆ یا هه‌رێما كوردستانێ بهایێ هه‌موو پسۆله‌یێن مامه‌لێن هاتنوچوونێ زێده‌كر و ئه‌ڤ بڕیاره ژ لایێ جڤاتا وه‌زیرێن حوكمه‌تا هه‌رێمێ ڤه هاته په‌سه‌ندكرن و د هژمارا 193 یا رۆژناما وه‌قایعى دا هاتیه به‌لاڤكرن و ئه‌ڤرۆ رۆژا 3/3/2016 دێ كه‌ڤیته د وارێ بجه ئینانێ دا.
لیوا رزگار عه‌لى، رێڤه‌به‌رێ گشتى یێ هاتنوچوونێ ل هه‌رێما كوردستانێ دیار كر كو پشكه‌ك ژ ڤان بهایان دو جاران هند زێده‌بووینه بۆ نموونه هه‌كه د ده‌مێ بۆرى دا وه‌لاتیه‌كى كارێ ڤه‌گوهاستنا سالناما ترۆمبێلێ كربا بتنێ دا 52 هزار و 500 دینار ژێ هێنه وه‌رگرتن، به‌لێ نوكه بهایێ ڤێ چه‌ندێ بوویه 100 هزار دینار و بۆ خه‌ندان گۆت: “بۆ نووكرنا مۆله‌تا هاژووتنا ترۆمبێلى به‌رى نوكه 10 هزار دینار ژ شۆفێرى د هاتنه وه‌رگرتن، به‌لێ پشتى ڤێ بڕیارێ دێ 40 هزار دینار ژێ هێنه وه‌رگرتن”.
ناڤهاتى ئاماژه دا وێ چه‌ندێ كو بلندكرنا ڤان بهایان چو كارتێكرنێ ل وه‌لاتیان ناكه‌ت، چونكى وه‌لاتى رۆژانه ڤى كارى ئه‌نجام ناده‌ن و ل عیراقێ ئه‌ڤ بهایه گه‌له‌ك ژ یێن هه‌رێمێ زێده‌ترن.
