به‌ربژاره‌كا هه‌لبژارتنان ب توندى هاته قوتان
ئه‌ڤرۆنيوز:
به‌ربژاره‌كا ژن بۆ هه‌لبژارتنێن جڤاتا نوونه‌رين عيراقێ ب توندى ژئاليێ وه‌لاتيه‌كى ڤه دهێته قوتان وه‌كو نه‌رازيبوونه‌ك ژ وێنه‌كێ وێ يێ داناى ل سه‌ر ستوونه‌كا كاره‌بێ ل ده‌ڤه‌ره‌كا ناڤه‌راستا به‌غدا.
ئيمان جه‌بار، به‌ربژارا ليستا (ئه‌لفه‌تح) ب سه‌رۆكاتيا هادى عامرى، ئه‌ڤرۆ ئه‌ينيێ 27/4/2018 راگه‌هاند” به‌رى دو رۆژان ده‌مێ ئه‌ز ل گه‌ل تێما خوه يا كارێ بانگه‌شا هه‌لبژارتنان دگه‌ريام بۆ به‌لاڤكرن وهه‌لاويستنا پۆسته‌رێن خوه يێن بانگه‌شا هه‌لبژارتنان وده‌مێ گه‌هشتيمه ده‌ڤه‌را سيناعه ل نێزيك ده‌رگه‌هێ زانكۆيا ته‌كنولۆژى يێ تايبه‌ت ب ده‌ركه‌فتنا قوتابيان ڤه وده‌مێ دانانا پۆسته‌ره وێنه‌كێ من ل سه‌ر شوسته‌ى بێ كو سه‌رپێچيا قانوونى بكه‌م يان زيان ب دوكان يان خانيێن وه‌لاتيان بكه‌ڤيت يان پۆسته‌ره‌كێ دى يێ هه‌لبژارتنان بهێته ڤه‌شارتن، كه‌سه‌ك ل گه‌ل بابێ خوه هات وپرسياركر ئه‌ڤه وێنێ كيش به‌ربژارێ يه وژ كيش عه‌شيرێ وبنه‌مالێ يه ؟ وب ڤێ پرسيارا وى وه‌سا دياربوو كو عه‌شيره‌تان جهێن دياركرين يێن هه‌ين وبزاڤكر وێنه‌ى ب درينيت”.
وێ به‌ربژارێ دياركر” ده‌مێ تيما من يا بانگه‌شا بۆ دوپاتكرى هه‌كه ئه‌و وێنه جهێ دلته‌نگيا وى بيت، دێ راكه‌ن، ب ده‌نگه‌كێ بلند هه‌وار كر كو ئه‌و دێ وێنه‌ى درينيت وده‌ست ب گوتنا جڤينێن گه‌له‌ك كرێت كر”.
ئاماژه دا” ئه‌ز دترومبێلێ دا بووم وده‌مێ من زێده‌گاڤى وئاخڤتنێن وى ديتين، من ب رێيا موبايلى ڤيديۆ كر وهنده‌ك وێنه من بۆ گرتن، به‌لێ ئه‌و هات وهێرشى من كر وئه‌ز قوتام وخوين ژ ده‌ڤێ من هات وئازار گه‌هاندنه ده‌ستێ من ژى وپاشى خه‌لكى ئه‌و ژمن دووركر”.
ديسا گۆت” من چه‌ندين جاران په‌يوه‌ندى ب پۆليسان كر ل سه‌ر هژمارا 104 وهه‌ر دگۆت دێ نوكه گه‌هين، به‌لێ هه‌ر كه‌س نه‌هات ونه‌چار بووم ئه‌ز ب خوه چومه بنگه‌هێ پۆليسان ومن سكالا ل سه‌ر وى كه‌سى تۆماركر ول رۆژا ئێكشه‌مبى دێ چم به‌رده‌م دادوه‌رى دا ئاخڤتنێن من وه‌ربگريت”.
