به‌ربژاره‌ك د بانگه‌شا هه‌لبژارتنان دا خوه ب پێغه‌مبه‌ر ناڤ دكه‌ت
ئه‌ڤرۆنيوز:
به‌ربژاره‌كێ هه‌لبژارتنێن جڤاتا نوونه‌رێن عيراقێ كه‌فتيه به‌ر ڤه‌كۆلينێ ژئاليێ دادگه‌هێ ڤه ب تۆمه‌تا وێ چه‌ندێ دبانگه‌شا هه‌لبژارتنان دا خوه ب پێغه‌مبه‌ر ناڤ دكه‌ت.
مالپه‌رێ (الغد پرێس) يێ عيراقى ژ زارده‌ڤێ ژێده‌ره‌كى به‌لاڤكر كو دادگه‌ها ڤه‌كۆلينا باژێرێ ناسريه ل باشوورێ عيراقێ ڤه‌كۆلين ل گه‌ل به‌ربژاره‌كێ هه‌لبژارتنێن جڤاتا نوونه‌رێن عيراقێ دكه‌ت ب تۆمه‌تا ناڤ ئينانا خوه وه‌كو پێغه‌مبه‌ر وسه‌رۆكێ ليستا (حزبوللا) .
رافد زه‌يدى، جێگرێ ريڤه‌به‌رێ ئۆفيسا زيقار يا كۆمسيۆنا هه‌لبژارتنان ل عيراقێ بۆ وى مالپه‌رى دياركر چو پێزانينێن فه‌رمى ژئاليێن حكومى وئه‌منى نه‌گه‌هشتينه كۆمسيۆنێ ل دۆر ده‌سته‌سه‌ركرنا كه‌سه‌كێ بانگه‌شا پێغه‌مبه‌ربوونا خوه دكه‌ت وهه‌وا خوه يا هه‌لبژارتنان ل جادێن ناسريێ (سه‌نته‌رێ پاريزگه‌ها زيقار) كربيت.
وه‌كو ديار د پۆسته‌ره‌كێ بانگه‌شا هه‌لبژارتنان يا به‌ربژار (ياسر ناسر حسێن) خوه ب به‌رپرس وسه‌ركردێ حزبوللا رۆناهيا ئه‌سمان وئه‌ردى وپێغه‌مبه‌ر دده‌ته نياسين.
