به‌رهه‌مێ كارێ چاندنێ ب زه‌حمه‌ت دبیته پاره
ئه‌ڤرۆ نیۆز،زنار تۆڤى:
پرانیا ئه‌و خه‌لكێ ل ده‌ڤه‌رێن چیایى دژین،ل وه‌رزێن پاییز و زڤستانێ و سه‌رمایێ دا بێ كار دمینن و نه‌شێن چو داهاتى بۆ خوه په‌یدا بكه‌ن و گه‌له‌ك ژ وان نه‌چار دبن قه‌ستا باژێران دكه‌ن،ژ پێخه‌مه‌ت ب ده‌ست خستنا كارى و په‌یداكرنا داهاته‌كێ بۆ ده‌بارا ژیانا خوه،له‌ورا سال بۆ سالێ خه‌لكێ وان ده‌ڤه‌ران گوندێن خوه چۆل دكه‌ن و قه‌ستا باژێران دكه‌ن،چونكى ئه‌و داهاتێ ل وه‌رزێ بهارێ و هاڤینێ بۆ وان ژ چاندنێ و كاركرنێ دهێت،تێرا وان ناكه‌ن بۆ هه‌ردو وه‌رزێن پاییزێ و زڤستانێ.
شۆره‌ش ئیسلام گه‌نجه‌كه بۆ ئه‌ڤرۆ نیۆز دبێژیت:پرانیا خه‌لكێ ده‌ڤه‌رێن چیایى ئه‌وێن پێ چێبووى و حالێ وان یێ باش گوندێن خوه هێلاینه قه‌ستا باژێران كریه،ئه‌وێن ماین ژى دبێ رێنه و هه‌كه وان ژى پێ چێببیت دێ قه‌ستا باژێران كه‌ن و نامینن،دیسا پتریا ئه‌و خه‌لكێ ماینه ل سه‌ر گوندان ژى ته‌رش و كه‌والى بخودان ناكه‌ن،هه‌روه‌سا نوكه ل هه‌ر گونده‌كێ چه‌ند ماله‌كێن كێم ماینه و ئه‌و ژى نه‌شێن خوه بهێلنه ب هیڤیا چه‌ند په‌زه‌كێن كێمڤه و هه‌ر چه‌ند رۆژان جاره‌كێ بچنه به‌ر په‌زى،لێ به‌رى نوكه ل هه‌ر گونده‌كى گه‌له‌ك مال لێ هه‌بوون و گه‌له‌ك ته‌رش و كه‌وال ژى بخودان دكرن و ب ڤى ره‌نگى وان هه‌ڤكاریا ئێكودۆ دكر و د هه‌موو كارێن گوندى دا و شۆلێن وان ب هه‌ڤرا د قه‌تیا،لێ نوكه ئه‌و هه‌موو نه‌مایه و گوت ژى:خه‌لكێ ده‌ڤه‌رێن چیایى ل وه‌رزێن پاییزێ و زڤستانێ بێ كار دمینن و نه‌چار دبن كو رۆژانێن خوه ل به‌ر سۆپێ و ب بێزارى و بێ كار ببورینن و چو كار ژى ب ده‌ست ناكه‌ڤن بكه‌ن،داكو پێ ده‌بارا ژیارا خوه بكه‌ن،له‌ورا ل ڤان هه‌ردو وه‌رزان ژیانا وان گه‌له‌ك ئالۆز دبیت،هه‌روه‌سا گه‌له‌ك ژ وان نه‌چار دبن و دچنه باژێران،ژ پێخه‌مه‌ت بشێت ده‌لیڤه‌كا كارى بۆ خوه په‌یدا بكه‌ت و داهاتیه‌ك ژى بۆ خێزانا وى ژێ بهێت،هه‌ر چه‌نده گه‌له‌ك ژ وان ئه‌وێن چووینه باژێران ژى كرێدار ژى بووینه،لێ نه‌چار دبن ڤى كارى بكه‌ن،چونكى ل گوندان چو ده‌لیڤێن كارى ب ده‌ست ناكه‌ڤن.
ناڤهاتى دیاركر ژى:ئه‌م كارێ چاندنێ دكه‌ین و مه چه‌ند زه‌ڤى شوینكرینه،سه‌ره‌راى كارێ ئاڤدانێ و هه‌موو ئه‌و زه‌حمه‌تا ئه‌م پێڤه دبه‌ین،سالێ هه‌موویێ ب زۆرى 500 هزار دینار دگه‌هنه مه و ئه‌ڤه پاره تێرا مه دو هه‌یڤان ژى ناكه‌ت،ئانكو ئه‌و داهاتێ ئه‌م ل بهار و هاڤینێ وه‌ر دگرین ژى تێرا مه ل پاییز و زڤستانێ ناكه‌ت،له‌ورا ئێدى ئه‌م نه‌شێین ب كارێ جۆتیاریێ بژین،لێ هه‌كه هنده‌ك كارگه‌ه و ده‌لیڤێن كارى هه‌بان دا ئه‌م ژى شێین بۆ خوه كاركه‌ین و ده‌بارا ژیانێ خوه پێ كه‌ین،لێ نوكه سه‌رێ رێیا ل به‌ر مه به‌رزه‌بوویه و ئێدى ژیانا مه گه‌له‌ك ب زه‌حمه‌ت كه‌فتیه.
نزار حه‌سه‌ن گوندنشینه‌كه دبێژیت:ل گوندان هه‌ر كه‌سه‌كێ كارێ وى ب یێ دى دقه‌تیت،لێ نه‌بوونا مرۆڤان ل گوندا و چوونا وان بۆ باژێران وه‌كریه كو ده‌لیڤێن كارى ل گوندان نه‌مینن،دیسا ئه‌و مالێن زارۆیان وان مه‌زن ژى دبن،زارۆیێن وان قه‌ستا باژێران دكه‌ن،هه‌م ل باژێران دخوینن،هه‌م ژى پشتى خواندنێ بۆ خوه كار دكه‌ن و ب ڤێ چه‌ندێ ئه‌و دشێن داهاته‌كێ بۆ خێزانێن خوه په‌یدا بكه‌ن،لێ هه‌كه ئه‌و ب میننه ل گوندى دێ خواندنا وان ژێ چیت و نه‌شێن بۆ خوه كار بكه‌ن،چونكى هه‌ر ده‌مێ قوتابى قۆناغا ئاماده‌یى ب دوماهى ئینا دێ نه‌چار بیت قه‌ستا باژێرى كه‌ت بۆ ته‌مامكرنا خواندنا خوه،چونكى ل هه‌ردو وه‌رزێن پاییزێ و زڤستانێ خه‌لكێ مه بێ كار دمینیت،له‌ورا خه‌لكێ گوندان ژ نه‌چارى بۆ په‌یداكرنا ده‌بارا ژیانا خوه قه‌ستا باژێران دكه‌ن،ژ پێخه‌مه‌ت بشێن داهاته‌كێ بۆ خێزانێن خوه دابین بكه‌ن و دیاركر ژى:گه‌له‌ك ژ وان خێزانێن ماینه ل سه‌ر گوندان،د بارودۆخه‌كێ سه‌خت یێ ژیانێدا دژین و ب زۆرى دشێن ب قه‌تینن،چونكى به‌رهه‌مێ وان ل وه‌رزێ گه‌هشتنا فێقى ب چو ناچیت و هه‌روه‌سا ژبه‌ر كێمیا خه‌لكێ ل سه‌ر گوندان ئێدى خه‌لك په‌زى ژى بخودان ناكه‌ن،هه‌روه‌سا نوكه گه‌له‌ك ب زه‌حمه‌ت پاره دكه‌ڤیته به‌ر ده‌ستێ مرۆڤى.
ژنه‌ك بناڤێ ساریا عاسم دبێژیت:ل وه‌رزێ بهارێ ده‌مێ گیایێ چیاى شین دبیت ئه‌م دچینه چیایى و گیایێن وه‌كى ستركێ و لیشێ و سوریازێ و كاریێ بۆ خوه دئینین و ل بازارى دفرۆشین و بۆ مه داهاته‌ك ژێ دهێت و ل هاڤینان ژى ئه‌م بۆ خوه هنده‌ك كه‌سكاتى دكه‌ین و دشێن پێ ده‌بارا ژیانا خوه بكه‌ین،لێ هه‌ر ده‌مێ پاییز و زڤستان گه‌هشتنێ ئه‌م بێ كار دمینین و ئه‌م نه‌شێن چو كارا بكه‌ین،چونكى به‌فر و بارانه‌كا زۆر ل ده‌ڤه‌رێن مه دبارن و ده‌لیڤێن كارى نامینن و سه‌قا گه‌له‌ك سار دبیت،له‌ورا ل ڤان هه‌ردو وه‌رزان ب زۆر و ب زه‌حمه‌ته‌كا زۆر ئه‌م دشێین ده‌بارا ژیانا خوه بكه‌ین و گوت ژى،هه‌روه‌سا ئه‌و پارێ ئه‌م ل بهار و هاڤینا وه‌ر دگرین تێرا پاییز و زڤستانا مه ناكه‌ن و زۆر جاران ژبه‌ر نه‌بوونا كارى ئه‌م ده‌یندار دبین،چونكى ل گوندان ژ بلى كارێ چاندێ و جۆتیاریێ مه چو كارێن دیتر نینن و ده‌لیڤێن كارى نوكه ل گوندان ب ئێكجارى نه‌ماینه.
