به‌رهه‌م سالح بزاڤێن ژناڤبرنا هه‌ڤپه‌يمانيێ دكه‌ت
ئه‌ڤرۆ نيوز، عه‌زيز هه‌ورامى:
رۆژا 9ى ڤێ هه‌يڤێ هه‌ڤپه‌يمانى بۆ ديموكراسى و دادپه‌روه‌ريێ د كۆمبوونه‌كا گشتى دا، بڕيار دا هه‌ڤپه‌يمانى بمينيت و ناڤێ وێ بهێته گوهۆڕين بۆ هه‌ڤپه‌يمانيا نشتيمانى، به‌رهه‌م سالح ژى بزاڤێ دكه‌ت ژ ناڤ ببه‌ت.
ب گۆره‌يى وان پێزانينێن ژ ژێده‌ره‌كێ ناڤ هه‌ڤپه‌يمانيێ ب ده‌ستێ ئه‌ڤرۆ نيوز كه‌فتين، به‌رهه‌م سالح پشتى ب چه‌ند رێيه‌كان بزاڤ كرى كۆمبوونا گشتى يا هه‌ڤپه‌يمانيێ ل 9ى چريا دويێ ل هه‌وێر نه‌هێته گێران، به‌لێ بزاڤێن وى سه‌رنه‌گرتين، نوكه سه‌رۆك كۆمار د رێيا هنده‌ك كه‌سێن ئێكه‌تى يێن ناڤ هه‌ڤپه‌يمانيێ كو د دانوستاندنان دانه بۆ ڤه‌گه‌ريانا وان بۆ ناڤ ئێكه‌تيێ و پشكه‌ك نينن ژ هه‌ڤپه‌يمانى بۆ ديموكراسيێ، فشاره‌كا مه‌زن خستيه سه‌ر وان كه‌سان ب ره‌نگه‌كى كو هنده‌كان به‌رى نوكه هاريكاريا وان كريه و پاره داينێ و دداننه به‌رچاڤێن وان و هنده‌كان ژى گه‌فێن بڕينا سپۆنسه‌ريا خواندنێ ژێ دكه‌ن، هه‌كه د ناڤ هه‌ڤپه‌يمانيێ دا بمينن.
هه‌مان ژێده‌ر يێ كو پاراستن ل سه‌ر ناڤێ خوه كرى گۆتژى: “ته‌ماميا بزاڤێن به‌رهه‌م سالح، ب تنێ د پێناڤى رێگرى ل شێوازێ به‌رفره‌هێ پێنگاڤا ئێكێ يا هه‌ڤپه‌يمانى بۆ نشتيمانيێ كر”.
پشتى دكتور به‌رهه‌م سه‌رۆكێ هه‌ڤپه‌يمانى بۆ ديموكراسى و دادپه‌روه‌ريێ بجهـ هێلايى و چوويه ناڤ رێزێن ئێكه‌تيێ دا كو بكه‌نه سه‌رۆك كۆمار، هه‌ڤپه‌يمانيێ ب ئاماده‌بوونا 400 ئه‌ندامێن خوه كۆمبوو و ب پتريا ده‌نگان هه‌ڤپه‌يمانى وه‌كو قه‌واره‌كێ سياسى هێلا، ئارام قادر ژى وه‌كو سه‌رۆكێ هه‌ڤپه‌يمانيێ هاته هه‌لبژارتن.
