به‌رپرسه‌كێ وه‌زاره‌تا پێشمه‌رگه‌ی: رێككه‌فتن ل گه‌ل به‌غدا نه‌هاتیه كرن
ئه‌ڤرۆ نیوز، ئه‌یاد به‌رواری:
به‌رپرسه‌كێ وه‌زاره‌تا پێشمه‌رگه‌ی راگه‌هاند دكۆمبوونێن به‌ری نوكه دناڤبه‌را شانده‌كێ له‌شكری یێ عیراقێ وفه‌رماندێن پێشمه‌رگه‌ی، لێك تێگه‌هشتنه‌كا باش یا هه‌ی به‌لێ هه‌تا رێككه‌فتن نه‌هاتیه كرن.
فه‌ریق (جه‌مال محه‌مه‌د) سوپا سالارێ پێشمه‌رگه‌ی بۆ دوارۆژ گۆت” دسێ كۆمبوونێن به‌ری نوكه یێن شاندێن له‌شكری یێن عیراقێ وكوردستانێ ل دۆر راده‌ستكرن وهاتنا هێزێن عیراقی بۆ هنده‌ك ده‌ڤه‌رێن ده‌شتا نه‌ینه‌وا وده‌رگه‌هێن سنۆری یێن پێشابیرێ وئیبراهیم خه‌لیل، گله‌ك پێشنیاز وبۆچوون ژلایێ هه‌ردو شاندان هاتن به‌رچاڤكرن وبوونه ئه‌گه‌رێ لێك تێگه‌هشتنه‌كا باش دناڤبه‌را هه‌ردو لایه‌نان دا، به‌لێ چو رێككه‌فتن نه‌هاتینه كرن”.
فه‌ریق جه‌مالی دیاركر، بۆ گه‌هشتن ب رێككه‌فتنه‌كا له‌شكری دناڤبه‌را هه‌ولێرێ و به‌غدا، پێدڤی ب رێككه‌فتنا سیاسی هه‌یه ب ناڤبژیڤانیا هه‌ڤپه‌یمانان، خویاكر ژی كو هنده‌ك ده‌ڤه‌رَن به‌غدا داخواز دكه‌ت، ده‌ڤه‌رێن دابرای نینن هه‌تاكو ب هه‌ڤپشكی دناڤبه‌را به‌غدا و هه‌رێمێ دا بهێته ب رێڤه‌برن، به‌لكو دكه‌ڤنه دسنۆرێ هه‌رێما كوردستانێ دا یێ كو ل سالا 1991 هه‌بوو.
وی به‌رپرسێ وه‌زاره‌تا پێشمه‌رگه‌ی ئاشكرا كر ژی، كۆمبوونێن بلند ویێن هونه‌ری دێ دبه‌رده‌وام بن ودێ كار ل سه‌ر وان پێشنیازان كه‌ن یێن كو به‌حسێ چاوانیا ب رێڤه‌برنا وان ده‌ڤه‌ران دكه‌ن ژروویێ ئیداری و له‌شكری ڤه، له‌وما هه‌تا دگه‌هنه رێككه‌فتنه‌كا هه‌ڤپشك، ب شێوه‌كی كو هه‌ردولا پێ دپابه‌ندبن، نه‌شێن بێژین ئه‌م یێن گه‌هشتینه رێككه‌فتنه‌كێ.
