به‌رپرسێ لژنا پارتی ل شنگالی:خه‌لكێ شنگالێ ب ب هه‌موو پێكهاته‌یێن خوه ڤه ژ بڕیاره‌كا حوكمه‌تا ئیراقێ د ڕازی نینن
دهۆك، له‌زگین جوقی
به‌رپرسێ لژنا ناوچا شنگالێ یا پارتی دیموكراتی كوردستان دبێژیت، خه‌لكێ شنگالێ ب هه‌موو پێكهاته‌یێن خوه ڤه ژ بڕیاره‌كا حوكمه‌تا ئیراقێ د ڕازی نینن.
سلێمان حه‌سه‌ن، به‌رپرسێ لژنا پارتی ل شنگالێ دیاركر” خه‌لكێ شنگالێ ب گشتی ب هه‌موو پێكهاته‌یێن خوه ژ بڕیارا هه‌لوه‌شاندنا هووربینیا ئه‌منی دڕازی نینن چونكو هه‌كه هووربینیا ئه‌منی نه‌بیت دێ داعش زڤریته شنگالێ و چ ڤه‌كۆلین ژی دگه‌لدا ناهێته كرن، خه‌لكێ شنگالێ هه‌تا نوكه ژی ماینه د بن خێڤه‌تاندا ونه‌شێاینه ژ به‌ر خرابیا ڕه‌وشا شنگالێ ڤه‌گه‌رن وده‌مێ حوكمه‌تا ئیراقێ بڕیارا هه‌لوه‌شاندنا هووربینیا ئه‌منی ده‌ركری، ب ئیكجاری خه‌لكێ شنگالێ بۆ زڤرینێ بێ ئومێدكرن”.
خه‌یری زیبان، چالاكڤانێ ئێزدی ل شنگالێ گوت” به‌رێ نوكه حوكمه‌تا ئیراقێ هووربینیا ئه‌منیی بۆ خه‌لكی ل مووسل ئه‌نجام ددا ژبه‌ر هه‌بوونا تیرۆرستێن داعشێ وكه‌سێن گومانلیكری یێن كو ده‌ست د كاره‌ساتا شنگالێ دا هه‌ین بۆ پشت ڕاستبوونێ ژ نه‌مان و ده‌سته‌سه‌ركرنا تیرۆرستێن داعشێ نوكه حوكمه‌تا ئیراقێ بڕیار دایه پرۆسه‌یا هووربینیا ئه‌منی نه‌مینیت و ب ڤێ چه‌ندێ هه‌ر كه‌سه‌ك دشێت ڤه‌گه‌ریته شنگالێ هه‌تا ده‌ست د كاره‌ساتا شنگالێ ژی دا هه‌بیت دشێت ڤه‌گه‌ریت و چ هووربینیا ئه‌منی دگه‌لدا ناهێته كرن وئه‌ڤ ئه‌ڤ چه‌نده بوویه جهێ دلگرانیا خه‌لكێ شنگالێ ژ به‌ر كو ئه‌و كه‌سێن ده‌ست د تاوانا شنگالێ دا هه‌ین ل سالا 2014ێ بیێ هووربینیا ئه‌منی دێ هه‌موو زڤرنه شنگالێ و بنه مه‌ترسی ل سه‌ر ئێزدیان”.
گوت ژی” نوكه ترسه‌كا مه‌زن ل ده‌ف خه‌لكێ شنگالێ په‌یدا بوویه ب تایبه‌تی ژی ل ده‌ف ئێزدی و كریستیانان وئه‌ڤ بڕیارا حوكمه‌تا ئیراقێ بۆ وێ چه‌ندێ یه بیژنه ئێزدیان جهێ هه‌وه ل شنگالێ نینه چونكو هه‌كه داعش و خێزانێن داعش ڤه‌گه‌رنه شنگالێ دێ چه‌وا كه‌سێ ئێزدی یێ زولم دیتی و كچ وژن وزارۆێن وی هاتینه ڕه‌ڤاندن شێت ڤه‌گه‌ریته شنگالێ”.
ڕۆهنكر ژی” پێدڤیه به‌غدا ڤێ بڕیارا خوه هه‌لوه‌شینیت وپرۆسه‌یا هووربینیا ئه‌منی دگه‌ل خه‌لكێ ئه‌نجام بده‌ت پێخه‌مه‌ت ده‌سته‌سه‌ركرنا هه‌موو وان كه‌سێن ده‌ست د كاره‌ساتا شنگالێ دا هه‌ین”.
خه‌یری زیبان، خویاكر” بڕیارا هه‌ولوه‌شاندنا هووربینیا ئه‌منی بڕیاره‌كا مه‌ترسیداره ل سه‌ر ژیانا ئێزدیان ژ به‌ر كو هه‌كه ئه‌و پرۆسه‌یه نه‌بیت ڕامانا وێ چه‌ندی یه كو حوكمه‌تا ئیراقێ بڕیارا ئازادكرنا گشتی بۆ وان كه‌سان دایه یێن دگه‌ل تیرۆرستێن داعشێ كو ئێزدی تووشی جینوسایدی كرین ل 2014ێ ژبه‌ر ڤی ئێكێ ژی ئێزدی گه‌له‌ك دلگران و بێ ئومید بووینه بۆ زڤرینا شنگالێ”.
