به‌سرا گه‌فێن راگرتنا به‌رهه‌مئينانا په‌ترۆلێ ل به‌غدا دكه‌ت
ئه‌ڤرۆنيوز:
حوكمه‌تا خوه‌جهى يا پارێزگه‌ها به‌سرا گه‌فان ل حوكمه‌تا فيدرالى يا عيراقێ دكه‌ت هه‌كه پارێ په‌ترۆدۆلار بۆ پارێزگه‌ها به‌سرا خه‌رج نه‌كه‌ت، دێ به‌رهه‌مئينانا په‌ترۆلێ راگريت.
رۆژناما (الحياه) يا له‌نده‌نى ل سه‌ر زارێ ئه‌حمه‌د عه‌بدولحسێن ئه‌ندامێ جڤاتا پارێزگه‌ها به‌سرا ڤه‌گۆهاست كو سه‌ره‌راى هنارتنا داخوازيێن مه بۆ به‌غدا، هه‌تا نوكه پارێزگه‌ها به‌سرا مافێن خوه وه‌رنه‌گرتينه.
گۆت ژى” جڤاتا پارێزگه‌ها به‌سرا خواندن بۆ هه‌موو ئه‌گه‌ران كريه كو ل ده‌مێن داهاتى دا پێنگاڤێن بۆ ب هاڤێژيت، ژوان پێنگاڤان ژى راگرتنا به‌رهه‌مئينانا په‌ترۆلێ ل وێ پارێزگه‌هێ.
به‌رى چه‌ند سالێن كێم، وائيل عه‌بدوله‌تيف وه‌زيرێ به‌رێ يێ كاروبارێن پارێزگه‌ه وهه‌رێمان ل عيراقێ وپارێزگه‌رێ به‌رێ يێ به‌سرا بۆ رۆژناما ئه‌ڤرۆ گۆتبوو” پارێزگه‌ها به‌سرا 85% ژ په‌ترۆلێ عيراقێ به‌رهه‌م دئينيت وحوكمه‌تا عيراقێ 1% ژى ژ بودجا عيراقێ بۆ به‌سرا خه‌رج ناكه‌ت”.
