به‌سرا 100 پرۆژێن ب له‌ز بۆ حوكمه‌تا عیراقێ بلندكرن
ئه‌ڤرۆنیوز:
ئه‌ندامه‌كێ تۆرا راگه‌هاندنا عیراقێ ژ به‌سرا بۆ ئه‌ڤرۆنیوز راگه‌هاند، پارێزگه‌ها به‌سرا پتر ژ 100 پرۆژێن گرنگ یێن گرێداى كاره‌بێ وئاڤێ بۆ جڤاتا وه‌زیرێن عیراقێ بلندكرینه ژبۆ بجهئینانا وان پرۆژان وه‌كو ل دووڤ هاتنا داخوازیێن خوه‌نیشانده‌رێن پارێزگه‌ها به‌سرا.
عه‌لى سارى، رۆژنامه‌ڤان ژتۆرا راگه‌هاندنا عیراقێ ل به‌سرا بۆ ئه‌ڤرۆنیوز گۆت” ئه‌و پرۆژه یێن ژلایێ جڤاتا پارێزگه‌ها به‌سرا ڤه هاتینه بلندكرن بۆ جڤاتا وه‌زیرێن عیراقێ ب مه‌ره‌ما بجهئینانا وان”.
عه‌لى دیاركر ژى” پشتى سه‌ره‌دانا حه‌یده‌ر عه‌بادى سه‌رۆك وه‌زیرێن عیراقێ بۆ به‌سره ل ده‌مێ خوه‌نیشادانان، لژنه‌كا وه‌زارى پێكئینابوو بۆ سه‌حكرنا داخوازیێن خوه‌نیشانده‌ران وبجهئینانا وان داخوازیان”.
خویاكر” وێ لژنا وه‌زارى ئه‌وا ژلایێ عه‌بادى ڤه هاتیه پێكئینان، داخواز ژ جڤاتا پارێزگه‌ها به‌سرا كربوو راپۆرته‌كا هه‌مه‌لایه‌نه ل دۆر پرۆژێن ب له‌ز ویێن پاشه‌رۆژێ كو بهایێ وان هه‌موو پرۆژه‌یان ژ 3 ترلیۆن ونیڤان نه‌بۆریت”.
ئاماژه دا كو پتریا وان 100 پرۆژه‌یێن هاتینه بلندكرن بۆ حوكمه‌تا ناڤه‌ندى ل به‌غدا یێن دبوارێن ئاڤێ وكاره‌بێ وچاره‌سه‌ریا سیربوونا ئاڤێ وویستگه‌هێن به‌رهه‌مئینانا كاره‌بێ زێده‌بارى دابینكرنا ده‌لیڤێن كارى بۆ وه‌لاتیێن پارێزگه‌هێ یێن بێكار”.
