به‌شار ئه‌سه‌د گه‌فان ل ئه‌مريكا دكه‌ت
ئه‌ڤرۆ نيوز، فاتما مزوورى:
د هه‌ڤديتنه‌كا نوو دا، به‌شار ئه‌سه‌د، سه‌رۆكێ رژێما سوريا ل گه‌ل كه‌نالێ رۆسيا توده‌ى دان پێدانێ ب وێ چه‌ندێ ناكه‌ت كو ئه‌فسه‌رێن ئيرانى يێ د ناڤ سۆپايێ وى دا هه‌ين و هاريكاريا وان دكه‌ن.
ره‌تكر ژى كو چو هێزێن ئيرانى ل ناڤ ئاخا وان هه‌بن و گۆت: “هێرشێن ڤێ دووماهيێ يێن ئسرائيلێ بۆ سه‌ر ئاخا سوريا، بووينه ئه‌گه‌رێ گيان ژ ده‌ست دانا چه‌ندين وه‌لاتيێن سورى و چو كه‌سه‌كێ ئيرانى د وان هێرشان دا نه‌هاتيه كوشتن”.
ئه‌سه‌د د ديدارێ دا په‌يامه‌ك ئاراسته‌ى ئه‌مريكا كر و گۆت: “دڤێت ئه‌مريكا ژ سوريا ده‌ركه‌ڤيت، هه‌كه نه، دێ وێ نه‌چار كه‌ين كو ب ده‌ركه‌ڤيت”.
سه‌رۆكێ رژێما سوريا گه‌فێن بكارئينانا هێزێ ل دژى هێزێن سوريا ديموكرات ژى كرن و ئاماژه دا وێ چه‌ندێ كو ئه‌و بۆ دانوستاندنان ژى ل گه‌ل وێ هێزێ د ئاماده‌نه.