به‌غدا به‌حسێ ئه‌گه‌رێ به‌رده‌واميا دۆرپێچا ل سه‌ر فرۆكخانێن كوردستانێ دكه‌ت
ئه‌ڤرۆنيۆز:
حوكمه‌تا عيراقى راگه‌هاند، چو ده‌مێن دياركرى بۆ راكرنا دۆرپێچا ل سه‌ر هه‌ردو فرۆكخانێن هه‌ولێرێ وسلێمانيێ نينن وداخوازا مه يا رۆهنه ئه‌وژى ئه‌و هه‌ردو فرۆكخانه بهێنه دبن ده‌ستهه‌لاتا حوكمه‌تا فيدرالى دا.
سه‌عه‌د حه‌ديسى، په‌يڤدارێ نڤيسينگه‌ها راگه‌هاندنێ يا سه‌رۆك وه‌زيرێن عيراقێ، ئه‌ڤرۆ دداخۆيانيه‌كا رۆژنامه‌ڤانى دا، گۆت”چو ده‌مێن دياركرى بۆ راكرنا دۆرپێچا ل سه‌ر گه‌شتێن نێڤده‌وله‌تى بۆ هه‌ردو فرۆكخانێن هه‌ولێرێ وسلێمانيێ نينن وچو راستى ژى بۆ دياركرنا ژڤانه‌كى بۆ راكرنا وێ دۆرپێچێ ژلايێ ده‌ستهه‌لاتا فرۆكه‌ڤانيا مه‌ده‌نى ل عيراقێ نه‌هاتينه ده‌ستنيشانكرن”.
سه‌عد حه‌ديسى، ل دووڤ مالپه‌رێ ئه‌لمه‌علومه، زێده‌تر رۆهنكر” ڤه‌كرنا ده‌رگه‌هێ گه‌شتێن نێڤده‌وله‌تى بۆ فرۆكخانێن هه‌رێمێ دێ هێته ڤه‌كرن، ده‌مێ هه‌ردو فرۆكخانێن هه‌ولێرێ وسلێمانيێ دهێنه دبن ده‌ستهه‌لاتا فرۆكه‌ڤانيا مه‌ده‌نى يا فيدرالى ل عيراقێ، به‌لێ هه‌تا نوكه چو پێشڤه‌چوون نينن دپرسا ئێكلاكرنا باده‌كا فرۆكخانێن هه‌رێما كوردستانێ”.
خوياكر ژى” هه‌رده‌مێ فرۆكخانێن ناڤبرى دهێنه دبن ده‌ستهه‌لاتا فرۆكه‌ڤانيا مه‌ده‌نى يا فيدرالى دا، دێ دۆرپێچ ل سه‌ر گه‌شتێن نێڤده‌وله‌تى هێته راكرن”.
