به‌پرسێ په‌یوه‌ندیێن ئیراقی و نیشتمانی یێن پارتی:گرنگه د چارچۆڤێ فراكسیۆنێ، یان هه‌ڤپه‌یمانیێ، یان هه‌ر چه‌تره‌كێ دی بیت ب ئێكگرتی بچینه به‌غدا
ئه‌ڤرۆ:
به‌رپرسێ په‌یوه‌ندیێن ئیراقی و نیشتمانی یێن پارتی دیموكراتی كوردستان، راگه‌هاند پارتی هه‌ڤتێگه‌هشتن و نێزیكبوون ل گه‌ل ره‌وتێ سه‌دری یا هه‌ی، به‌لێ ئه‌ڤ چه‌نده مه ل گه‌ل لایه‌نێن دی ژی هه‌یه، ب تایبه‌ت لایه‌نێن شیعی و سوننی.
عه‌لی حسێن، به‌رپرسێ په‌یوه‌ندیێن ئیراقی و نیشتمانی یێن پارتی گۆت” مخابن ل ده‌مێن بۆری گرفت د ناڤبه‌را مه و به‌غدا پرسا بجهنه‌ئینانا دستووری بوو، له‌وما دێ بزاڤێ كه‌ین ل گه‌ل لایه‌نێن سیاسی یێن كوردستانی دانوستاندنان بكه‌ین و پێكڤه ل گه‌ل لایه‌نێن ئیراقێ باخڤین و ژ نوكه دێ ده‌ست ب دانوستاندنان ل گه‌ل لایه‌نێن كوردستانی و به‌ری ل گه‌ل به‌غدا باخڤین، ل گه‌ل لایه‌نێن كوردستانی كۆمبین و پێدڤیه خالێن هه‌ڤپشك كۆم بكه‌ین بۆ وێ چه‌ندێ مه كاریگه‌ری ل سه‌ر ئیراقێ هه‌بیت و ئه‌وا گرنگ ل ده‌ف مه ئه‌وه كو موساوه‌مێ ل سه‌ر پۆست و مافێن خوه ل به‌غدا ناكه‌ین.
ئاماژه كر ژی” یا گرنگ ئه‌وه ئه‌م ل ناڤمالا خوه ل كوردستانێ خوه كۆم بكه‌ین، ئه‌ڤجا د چارچۆڤێ فراكسیۆنێ، یان هه‌ڤپه‌یمانیێ، یان هه‌ر چه‌تره‌كێ دی یێ سیاسی بیت و ب ئێكگرتی بچینه به‌غدا، ڤێجارێ دبیت پرس بۆ لایه‌نێن ئیراقی ژی ب ساناهیتر بیت، چونكه پشكه‌ك ژ لایه‌نێن ئیعی ب هێزن و رێككه‌فتن ل گه‌ل وان لایه‌نێن ب هێز یا ب ساناهیتره”.
عه‌لی حسێن دیاركر كو پشتی راگه‌هاندنا ئه‌نجامێن فه‌رمی یێن هه‌لبژارتنان، دێ ده‌ست ب دانوستاندنان كه‌ین و لایه‌نێن سیاسی یێن كوردستانی د ئاسته‌كێ بلند دا دێ مه دانوستاندن هه‌بن و دێ ل گه‌ل لایه‌نێن ئیراقی ژی دا كه‌ڤینه د دانوستاندنێ دا و دبیت شاندێ ئیراقێ بهێته كوردستانێ و ئه‌م ژی بچینه به‌غدا و ل رۆژێن داهاتی ئه‌و پرسه دێ بیته دانوستاندنا گه‌رم یا لایه‌نێن سیاسی.
سه‌باره‌ت داخۆیانیێن به‌رپرسێن لیستا (قادمون) كو 37 كورسی ل جڤاتا نوونه‌رێن ئیراقێ یێن كو ل گه‌ل ره‌وتی سه‌دری و پارتی دێ دانوستاندنێ ل دۆر پێكئینانا حوكمه‌تا ئیراقی یا نوو كه‌ن، عه‌لی حسێن گۆت” راستیه‌ك ل دۆر وێ چه‌ندێ یا هه‌ی و ئه‌و لایه‌نێن كورسیێن زۆر هه‌ین دێ كاریگه‌ری ل سه‌ر پێكئینانا حوكمه‌تێ هه‌بیت و سه‌باره‌ت وێ چه‌ندێ ژی دێ ده‌ست ب دانوستاندن و گوهۆرینا بیر و را هێته كرن، تاكو بزانین كی دخوازیت بنه‌مایێ هه‌ڤپشكیێ ل ئیراقێ بجهبینیت و كی دێ پترین داخوازی و مافێن گه‌لێ كوردستانێ بجه ئینیت، بۆمه گه‌له‌ك گرنگه كو بنه‌مایێ هه‌ڤپشكیێ ل ئیراقێ بهێته پاراستن”.
ل دۆر مه‌رجێن پارتی بۆ راسپاردنا سه‌رۆكێ حوكمه‌تا نوو یا ئیراقێ، دیاركر” ل ده‌ف مه هه‌ڤسه‌نگی و هه‌ڤپشكی و پێكڤه كاركرن و به‌رهه‌ڤی بۆ چاره‌كرنا گرفتان یا گرنگه و ئه‌م دشێین ب گۆره‌ی دستووری مه هه‌ڤتێگه‌هشتن هه‌یت”.
سه‌باره‌ت سیسته‌مێ پێكئینانا حوكمه‌تا نوو، دبێژیت” گرنگه ئه‌وه جوداهی دناڤبه‌را پێكهاتان نه‌هێته كرن و خزمه‌تا خه‌لكی بهێته كرن و ده‌نگێن نه‌رازی ب خزمه‌تگوزاریان بهێنه كێمكرن و ئارامی بۆ وه‌لاتی بزڤریت، له‌وما پێدڤیه حوكمه‌ته‌ك بهێته پێكئینان كو ده‌ربرینێ ژ هه‌موو پێكهاتێن ئیراقێ بكه‌ت و ئه‌و لایه‌نێن پێگه‌هێ وان ب هێز، هوكارێن خێرێ بن بۆ پێكئینانا حوكمه‌تێ و دخوازیت حوكمه‌ته‌كا هه‌ڤپشك یا بنكه به‌رفرهه بیت و هه‌موو لایه‌ن پشكدار بن تێدا.
