بو راگرتنا توپبارانكرنا تورکی دێ ئیمزا ھێنە کۆمکرن
ئەڤرۆ نیوز، نەوزاد ھلۆری:
د دەما ٤٨ دەمژمێرێن بوری فروکێن شەرکەرێن تورکیا ل سنوورێ ناحیا شێلادزێ ب تایبەتی دەڤەرا نێروەورێکان دزڤرن و پێنج جاران ژی چەند جھەکێن دەڤەرێ توپ باران كرينه
عەبدوللا ئیسماعیل، وەلاتیەکێ شێلادزێ یە دیارکر کو ئەڤە پتری ٤٨ دەمژمێرە فرۆکێن تورکیا چەند جارەکا سنورێ ناحیا شێلادزێ توپ بارانكريه و بۆ ئەڤرۆ گوت: (دماوەیێ پتری ٤٨ دەمژمێرێن بووری پتری سێ جاران فروکێن تورکیا گوندێن دەڤەرا نێروەورێکان توپ بارانكرينه، ب تایبەتی گوندێن شاجا و بێزەلێ و دەردورێن وان، دبێھنڤەدانا ئه‌ینیا بوری دا، خەلکەکێ زور قەستا سەر گوند و دەڤەرێن خوە کربوون، بەلێ ژ ئەنجامێ توپ بارانكرنێ بلەز ڤەگەریان ، توپ بارانكرن و زڤرینا فروکێن تورکیا بۆ دەڤەرا شێلادزێ بەردەوامە، چو کەس نەشێن بچنە دەڤەرێن خوە، خوە مروڤ نەشێت بچتە دەڤەرێن ئاڤەدان ژی).
زێدەتر گۆت: (بەردەوامبوونا فروکێن تورکیا بۆ دەڤەرا مە بوویە ئەگەر زێدەباری کو مەترسیێن ئێکسەر بو سەر گیانێ وەلاتیان ھەبیت، دھەمان دەم دا مەترسی بۆ سەر توپ باران كرنا جھێن بازرگانی و گەشتوگوزاری ژی ھەبیت مینا ھاڤینگەھا ئاڤا مارک، خوە ئەگەر توپ باران ژی نەکەن، خەلک نەشێت بچیتە وان جھان و بڤێ یەکێ کرین و فروتنا بازارێن ھاڤینگەھا ئاڤا مارک راوستایە و کارتێکرنەکا زۆر لسەر رەوشا بازارێن وان کرینە، ژبەرڤێ دخوازین کو دەڤەر بھێتە ئارامکرن و توپ باران كرن راوستن).
ئەحمەد شامکی، چالاکڤانەکێ شێلادزێ یە بۆ ئەڤرۆ نیوز گۆت: (توپ بارانا فروکێن تورکیا و زڤرینا وان لسەر گوندەوار و سەنتەرێ ناحیا شێلادزێ ژی بویە ئاوازەکا روژانە و خەلک ژ گازندەکرنێ ژی تێربوو، نوزانن ھەوارێن خوە بو راگرتنا بوردومانێ بگەھینە کێ؟ ژبەرڤێ بۆ جارا چەندێ دبێژین پێدڤی یە لایەنێن شولەژێ ھزرێ ل پاراستنا خەلکی و بەرژەوەندیێن خەلکی بکەن، چارەسەریەکێ بو راگرتنا شەری و بوردومانان بکەن، بەروڤاژی دێ خەلکێ دەڤەرێ درێژیێ ب کاروانێ قوربانیدانا ململانا سیاسی دەن).
پەیبەرێ ئەرتیسی، چالاکڤان و نڤیسەرێ ناسیارێ دەڤەرا ئامێدیێ و شێلادزێ ل بارا کارتێکرنێن بوردومانا فروکێن تورکیا بۆ سەر گوندەوارێن دەڤەرێ بۆ ئەڤرۆ گۆت: (نوکە زێدەتر ژ ٧٥% ژ خەلکێ دەڤەرا ئامێدیێ و شێلادزێ د رەوشەکا دەروونی و جڤاکی یا نەخوش دا دژین، نوکە ھەر کەسێ ل مالا خوە دەربکەڤیت ئەگەرا زڤرینا وی نینە و ئەگەرێ شەھید و بریندارکرنا وی ھەیە، ھەلبەت توپ بارانا تورکیا ھەموو ژ رەنگڤەدانا سیاسی پەیدابویە و ب سەر دەڤەرێ دا ھاتیە، دڤێت ھەر ب سیاسی ژی بھێتە چارەسەرکرن، ئەو ژی ب ڤەگەراندنا ئارامی و سەقامگیریا دەڤەرێ و ئەمن و ئاسایشا بەری دروستبوونا وان ئالوزیانە، نوکە ھەر خێزانەکا شێلادزێ ژ روویەکێ ڤە زیاندارێ توپ بارانا فروکێن تورکیایە، ھەیە ب گیانی َخوە و ھەیە ژی ب بیستان و رەزێ خوە و ھەیە ب گوندێ خوە).
پێشتر ئیدریس ھەرکی، ژ لژنا ئەمنی و نافخوە یا جڤاتا پارێزگەھا دھۆکێ بو ئەڤرۆ نیوز گۆت بوو: (بابەتێ توپبارانکرنا ھەرێما کوردستانێ ب گشتی و دەڤەرا ئامێدیێ ب تایبەتی ژلایێ فرۆکە و سوپایێ تورکیا ب ھەلویست و دەرئێخستنا بەیاننامە و خوەپێشاندان و رەتکرنێ ناھێتە راگرتن، ژبەرکو بابەت سیاسی یە و بەزاندنەکا رۆهن و ئاشکرا یا سەروەریا ھەرێما كوردستانێ و عیراقێ یە ژلایێ تورکیا، راگرتنا وێ دڤێت ب ھێزەکا چەکداری بیت، ھەرێما کوردستان و عیراق ژی نەشێت توپبارانکرنا سنوورێن ھەرێما کوردستانێ رابگرن، بەلکو دڤێت ھەردولا بزاڤێ بکەن ب رێیا لژنێن دەرڤەیێن پەرلەمانی و حوکمەتێ دەنگێ ستەما گەلێ کوردستانێ و قوربانیێن وان بگەھینن نەتەوەیێن ئێگرتی و ناتوی کو تورکیا ئێدی توپبارانکرنێ رابگریت، بەروڤاژی ھێزێ بەرامبەر بکاربینن، هه‌كه ئەڤ یەک نەھێتەکرن ب پستراستی دبێژم توپ بارانكرن و قوربانی دێ بەردەوام بن).
نێزیکێ ٢٠ سالایە توپ باران كرن يا بەردەوامە و زیانێن زور یێن مادی و گیانی ب وەلاتیان گەھشتینە، بەلێ ھەتا نوکە کەس نەھاتیە قەرەبوکرن، دڤی واریدا ھەرکی گۆت: (وەکو جڤاتا پارێزگەھا دھۆک مە ژ نێزیک سەرەدانا جھێن توپبارانێن بەری نوکە یێن تورکیا کریە و ھەموو پێزانین وەرگرتینە و بو لایەنێن شولەژێ بلندکریە، یا گرنگ ئەوە کو دەستپێکێ بوردومان بھێتە راگرتن، پاشان قەرەبویا خەلکێ زیانڤێکەفتی بھێتەکرن، ھندی عیراق و ھەرێم بێدەنگ بیت، ھەلبەت تورکیا و ئیران ژی دێ بەردەوام بن).
جھێ ئاماژە پێکرنێ یە کو د ئەڤ سالە دا فروکێن تورکیا ١٠٦ جاران و توپخانەیێن تورکیا ژی ٩١ جاران توپبارانکرنا دەڤەرا ئامێدیێ کریە و د ئەنجام دا پتری ٢٠ کەس ژ ولاتیێن دەڤەرێ شەھید و بریندارکرینە، ملیونان دولار ژی زیان ب رەز و بیستانان كه فتينه.
